İranın Xarici İşlər Nazirliyi bazar ertəsi günü nazir Abbas Əraqçinin Səudiyyə Ərəbistanının Xarici İşlər naziri ilə telefon əlaqəsi saxladığını açıqlayıb. İran Xarici İşlər Nazirliyindən verilən məlumata görə, telefon danışığı zamanı Abbas Əraqçi Pakistanda (İslamabad) keçirilən İran-ABŞ danışıqlarının gedişatı və əldə olunan son məqamlar barədə Səudiyyəli həmkarını ətraflı məlumatlandırıb.

Böyük Britaniyanın baş naziri Kir Starmer Hürmüz boğazı ilə bağlı ölkəsinin mövqeyini açıqlayıb. Baş nazir beynəlxalq dəniz keçidinin açıq qalmasının vacibliyini vurğulayaraq son həftələrdə bütün səylərin bu istiqamətə yönəldiyini qeyd edib. Bildirilib ki, Britaniya regionda hərbi imkanlarını əsasən boğazın təhlükəsiz və açıq saxlanmasına yönəldib. Bununla yanaşı, Starmer qeyd edib ki, ölkəsinə müharibəyə qoşulmaq üçün təzyiqlər olsa da, yalnız hüquqi əsas və dəqiq plan olduqda belə qərar qəbul edilə bilər.

İran ABŞ-nin “dəniz ablukası” ilə bağlı bəyanatlarından sonra bölgədəki limanların təhlükəsizliyi ilə bağlı sərt mövqe ortaya qoyub. Məlumata əsasən, Zülfiqari qeyd edib ki, İran öz ərazi sularında təhlükəsizliyi təmin etməkdə qərarlıdır. O bildirib ki, ABŞ və İsraillə əlaqəli gəmilərin Hörmüz boğazından keçidinə icazə verilməyəcək, digər gəmilər isə koordinasiya əsasında hərəkət edə biləcəklər.

İran və ABŞ nümayəndə heyətləri bu gün İslamabadda iki raunddan ibarət danışıqlar aparıblar. Bu barədə İranın Dövlət Televiziya və Radio Şirkəti xəbər verib. Məlumata əsasən, tərəflər arasında üçüncü görüşün axşam saatlarında keçirilməsi planlaşdırılır. Qeyd edək ki, Pakistanın vasitəçiliyi ilə keçirilən bu müzakirələrdə İran heyətinə parlament sədri Məhəmməd Baqir Qalibaf, ABŞ heyətinə isə vitse-prezident Ceyms Devid Vens başçılıq edir.

Fransa Prezidenti Emmanuel Makron şənbə günü Səudiyyə Ərəbistanının vəliəhd şahzadəsi Məhəmməd bin Salman ilə telefon əlaqəsi saxlayaraq, İslamabadda davam edən İran-ABŞ sülh danışıqlarını müzakirə etdiyini açıqlayıb. Liderlər bölgədəki vəziyyətlə bağlı sıx təmasda qalmaq barədə razılığa gəliblər. "X" sosial platformasındakı paylaşımında Makron atəşkəsə verdiyi dəstəyi yenidən ifadə edib. Fransa lideri vurğulayıb ki, hazırkı atəşkəsə tam əməl olunmalı və bu proses gecikmədən Livanı da əhalə etməlidir. Makron, həmçinin regiondakı humanitar və iqtisadi sabitlik üçün Livanın təhlükəsizliyinin vacibliyini qeyd edib.

İran Prezidenti Məsud Pezeşkian Pakistanın vasitəçiliyi ilə keçirilən ABŞ-İran müzakirələrinə dair mühüm açıqlamalar verib. Prezident İslamabaddakı diplomatik prosesin gedişatından asılı olmayaraq, ölkə daxilində xidmətlərin fasiləsiz davam edəcəyini vurğulayıb. Pezeşkian hazırda Pakistanda olan yüksək səviyyəli İran nümayəndə heyətinin fəaliyyətini yüksək qiymətləndirib: "Pakistandakı heyətimiz bütün varlığı ilə İranın maraqlarını qoruyur və bu istiqamətdə cəsurca danışıqlar aparır". O bildirib ki, diplomatik komanda Tehranın milli təhlükəsizlik və iqtisadi maraqlarından geri addım atmadan müzakirələri davam etdirir.

Qətər Əmiri Şeyx Təmim bin Həməd Al Tani Livan Prezidenti Cozef Aun ilə telefon danışığı apararaq, İsrailin Livana endirdiyi hava zərbələrini kəskin şəkildə pisləyib. Əmir Qətərin Livanın suverenliyi, təhlükəsizliyi və ərazi bütövlüyünə qarşı hər hansı müdaxiləni qətiyyətlə rədd etdiyini bildirib. Qətər Rəsmi Xəbər Agentliyinin (QNA) məlumatına görə, tərəflər Livandakı son hərbi gərginliyin ölkə və regionun sabitliyinə təsirlərini müzakirə ediblər.

İsrailin Baş naziri Benyamin Netanyahu İran ilə ABŞ arasında əldə olunan müvəqqəti atəşkəsə baxmayaraq, Livan ərazisinə hücumların davam etdiriləcəyini bildirib. O vurğulayıb ki, İsrail Hizbullah hədəflərinə qarşı əməliyyatları davam etdirəcək və “zəruri olan hər yerdə zərbələr endiriləcək”.

Pakistanın Baş naziri Şahbaz Şərif atəşkəs prosesinə verdikləri dəstəyə görə bir sıra ölkələrə təşəkkür edib. Şərif xüsusilə Çin, Səudiyyə Ərəbistanı, Türkiyə, Misir və Qətər-in atəşkəsin əldə olunmasına verdiyi “əhəmiyyətli və hərtərəfli dəstəyi” yüksək qiymətləndirib.

İran mediası gələn cümə günü Pakistanın paytaxtı İslamabadda Amerika Birləşmiş Ştatları ilə keçiriləcək tarixi danışıqlarda Tehranı təmsil edəcək şəxsin adını açıqlayıb. Eyni mənbələrin məlumatına görə, ABŞ tərəfini danışıqlarda vitse-prezident Cey Di Vens (JD Vance) təmsil edəcək. Bu, müharibənin başlanmasından bəri hər iki ölkənin ən yüksək səviyyəli rəsmiləri arasında keçiriləcək ilk birbaşa görüş olacaq.

ABŞ Prezidenti Donald Tramp İrana qarşı davam edən hərbi kampaniyanın gedişatı barədə mühüm statistik məlumatları açıqlayıb. Prezident Amerika Silahlı Qüvvələrinin son bir ayda həyata keçirdiyi əməliyyatların miqyasını "görünməmiş" adlandırıb. "Son 37 gün ərzində Amerikanın silahlı qüvvələri İran üzərində 10,000-dən çox döyüş uçuşu həyata keçirib – bu, eşidilməmiş bir göstəricidir."-deyə Prezident Donald Trampın bəyanatında qeyd edilib.

Türkiyənin xarici işlər naziri Hakan Fidan bu gün (6 aprel 2026-cı il) iranlı həmkarı Abbas Əraqçi ilə telefon əlaqəsi saxlayıb. Diplomatik mənbələrdən əldə edilən məlumata görə, nazirlər bölgədəki son hərbi-siyasi vəziyyəti və davam edən müharibənin gedişatını ətraflı müzakirə ediblər. Görüş zamanı nazir Hakan Fidan Türkiyənin regionda sabitliyin bərpası ilə bağlı narahatlıqlarını ifadə edib və mülki əhalinin təhlükəsizliyinin qorunmasının vacibliyini vurğulayıb.