BAKI,VOA, Fərid Mikayılov

İran mediası gələn cümə günü Pakistanın paytaxtı İslamabadda Amerika Birləşmiş Ştatları ilə keçiriləcək tarixi danışıqlarda Tehranı təmsil edəcək şəxsin adını açıqlayıb.

VOA xəbər verir ki, məlumata görə, İran nümayəndə heyətinə parlament sədri Məhəmməd Baqir Qalibaf rəhbərlik edəcək.

Eyni mənbələrin məlumatına görə, ABŞ tərəfini danışıqlarda vitse-prezident Cey Di Vens (JD Vance) təmsil edəcək. Bu, müharibənin başlanmasından bəri hər iki ölkənin ən yüksək səviyyəli rəsmiləri arasında keçiriləcək ilk birbaşa görüş olacaq.

Qeyd edək ki, çərşənbə günü səhər saatlarında ABŞ Prezidenti Donald Tramp İrana qarşı zərbələrin iki həftə müddətinə dayandırıldığını elan edib. Lakin Tramp bu addımı Hörmüz boğazının dərhal və tamamilə açılması, habelə atəşkəsin hər iki tərəf üçün məcburi olması şərti ilə bağlayıb.

Bu qərar Trampın Hörmüz boğazını açmaq üçün İrana verdiyi və "bütöv bir sivilizasiyanı məhv etmək" təhdidi ilə müşayiət olunan ultimatumun bitməsinə iki saatdan az vaxt qalmış qəbul edilib.

İran hökuməti bəyan edib ki, onların əsas hədəfi 15 günlük atəşkəs müddətində Pakistandakı danışıqları yekunlaşdırmaq və həm ABŞ, həm də İsrail ilə müharibəyə tamamilə son qoymaqdır.

Analitiklər Qalibaf kimi hərbi keçmişi olan bir siyasətçinin və ABŞ-ın vitse-prezidentinin bu danışıqlarda iştirakını tərəflərin yekun saziş əldə etmək məsələsində ciddi olduqlarının göstəricisi kimi qiymətləndirirlər.