BAKI,VOA, Fərid Mikayılov
İsrailin Baş naziri Benyamin Netanyahu İran ilə ABŞ arasında əldə olunan müvəqqəti atəşkəsə baxmayaraq, Livan ərazisinə hücumların davam etdiriləcəyini bildirib.
VOA xəbər verir ki, Netanyahu sosial şəbəkə vasitəsilə etdiyi açıqlamada Beyruta endirilən zərbələr nəticəsində “Hizbullah”la əlaqəli şəxsin öldürüldüyünü iddia edib.
O vurğulayıb ki, İsrail Hizbullah hədəflərinə qarşı əməliyyatları davam etdirəcək və “zəruri olan hər yerdə zərbələr endiriləcək”.
Qeyd olunub ki, İran ilə ABŞ arasında əldə edilən müvəqqəti atəşkəsin Livanı əhatə edib-etmədiyi məsələsi tərəflər arasında fikir ayrılığına səbəb olub.
Belə ki, Pakistanın Baş naziri Şahbaz Şərif atəşkəsin Livanı da əhatə etdiyini bildirsə də, ABŞ rəsmiləri bunun belə olmadığını açıqlayıb.
Eyni zamanda, İran tərəfi atəşkəsin regiondakı bütün hərbi əməliyyatların dayandırılmasını nəzərdə tutduğunu bəyan edib.