BAKI,VOA,Yusif Şərifzadə

Avropa İttifaqı ABŞ Prezidenti Donald Trampın İspaniyaya qarşı ticarət məhdudiyyətləri ilə bağlı açıqlamalarına baxmayaraq, Vaşinqtonun Avropa İttifaqı ilə əldə olunmuş ticarət razılaşmalarına sadiq qalacağını gözlədiyini bildirib.

VOA xəbər verir ki, Avropa Komissiyasının sözçüsü Olof Gill ABŞ-ın Avropa İttifaqı qarşısında götürdüyü öhdəlikləri yerinə yetirməsinin vacibliyini vurğulayıb. O bildirib ki, ötən il tərəflər arasında birgə bəyanat imzalanıb və Avropa İttifaqı həmin sənəd üzrə bütün öhdəliklərini yerinə yetirib.

Bu açıqlama ABŞ Prezidenti Donald Trampın Ankarada İspaniyanı NATO daxilində “pis tərəfdaş” adlandırmasından və maliyyə nazirinə bu ölkə ilə ticarət əlaqələrinin dayandırılması istiqamətində göstəriş verdiyini bildirməsindən sonra səsləndirilib. Tramp İspaniyanı İrana qarşı müharibəyə dəstək vermədiyinə görə də tənqid edib.

Olof Gill qeyd edib ki, Avropa Komissiyası Avropa İttifaqının və bütün üzv dövlətlərin maraqlarını qorumağa davam edəcək. Onun sözlərinə görə, qurum sabit, proqnozlaşdırılan və hər iki tərəf üçün faydalı transatlantik ticarət əlaqələrinin davam etdirilməsinin tərəfdarıdır.