BAKI, AzerVoice, Fərid Mikayılov

Arsenalın alman futbolçusu Kai Havertz dizindəki zədə səbəbindən sentyabr ayında keçiriləcək DÇ-2026 seçmə mərhələsinin oyunlarında Almaniya millisinin heyətinə daxil edilməyib.

AzerVoice xəbər verir ki, 26 yaşlı hücumçunun Slovakiya və Şimali İrlandiyaya qarşı görüşlərdə iştirak etməyəcəyi dəqiqləşib.

Havertz yeni mövsümün ilk turunda Mançester Yunaytedlə oyunda zədələnərək meydanı yarımçıq tərk edib.

O, ötən həftəsonu Arsenalın Lids üzərində 5:0 hesablı qələbəsində də iştirak etməyib. Baş məşqçi Mikel Arteta futbolçunun vəziyyəti ilə bağlı əlavə açıqlama verməyib.

Arsenal üçün Havertzin itkisi ciddi zərbədir. Komandanın digər hücumçusu Qabriel Jesus da diz əməliyyatından sonra oynaya bilmir. Bu səbəbdən hücum xəttində əsas məsuliyyət yay transfer pəncərəsində komandaya qoşulan Viktor Gyökeresin üzərinə düşəcək. Bununla yanaşı, Ebereçi Ezenin də gəlişi Artetanın seçim imkanlarını müəyyən qədər artırır.

London təmsilçisi ümid edir ki, Havertzin əməliyyata ehtiyacı olmayacaq. Əks halda, futbolçu bir neçə həftə deyil, aylarla meydanlardan kənarda qala bilər. Arsenal növbəti turda çempionluğun əsas iddiaçılarından olan Liverpulla qarşılaşacaq.