BAKI, AzerVoice, Nailə Babazadə
Türkiyə Super Liqasının yeni mövsümündə ilk turda Alanyasporla qarşılaşması təxirə salınan Fenerbahçe, liqadakı ilk oyununu İzmir səfərində keçirəcək. Fenerbahçe Göztepe ilə Gürsel Aksel Stadionunda üz-üzə gələcək.
AzerVoice xəbər verir ki, görüş bu gün saat 21:30-da start götürəcək. Oyun Yasin Kolun idarəçiliyi ilə baş tutacaq. Ona yan xətt hakimləri olaraq Ceyhun Sesigüzel və Mehmet Kısal kömək edəcək.
Fenerbahçe ötən mövsüm Super Liqanı ikinci sırada tamamlayaraq UEFA Çempionlar Liqasının 3-cü təsnifat mərhələsində oynamaq hüququ qazanmışdı. Klub ilk rəsmi oyununu Hollanda təmsilçisi Feyenoorda qarşı keçirmişdi.
Səfərdəki ilk matçda uzatma dəqiqələrində buraxdığı qolla 2-1 məğlub olan İstanbul klubu, cavab oyununda 5-2 hesablı qələbə qazanaraq pley-off mərhələsinə yüksəldi.
Türkiyə Futbol Federasiyası, avrokuboklarda iştirak edən komandaların ilk tur oyunlarını təxirə saldığı üçün, Fenerbahçe Super Liqadakı ilk qarşılaşmasına Göztepe səfərində çıxacaq.