BAKI,AzerVoice
Quba şəhərində “Birlik, Zəfər və Barışın Gücü: Qubadan Mediasiya Çağırışı” adlı regional tədbir keçirilib.
AzerVoice xəbər verir ki, tədbir 8 Noyabr – Zəfər Gününə, ölkədə mediasiya institutunun inkişafına və Quba 1 saylı Mediasiya Təşkilatının bir illik fəaliyyətinə həsr olunub.
Tədbir Quba Rayon İcra Hakimiyyəti, YAP Quba rayon Təşkilatı, Quba 1 saylı Mediasiya Təşkilatının təşkilatçılığı və Mediasiya Şurasının dəstəyi ilə baş tutub.
Rəsmi mərasim Ümummilli Lider Heydər Əliyevin abidəsi önünə gül dəstələrinin qoyulması ilə başlanıb. Daha sonra Heydər Əliyev Mərkəzində keçirilən plenar iclasda dövlət və yerli idarəetmə qurumlarının nümayəndələri, Mediasiya Şurasının rəhbərliyi, mediasiya təşkilatları, QHT-lər və media təmsilçiləri iştirak ediblər.
Tədbirdə Quba 1 saylı Mediasiya Təşkilatının bir illik fəaliyyətinə dair hesabat açıqlanıb. Plenar müzakirələrdə Zəfər Gününün mənəvi dəyəri, barış və anlaşma mədəniyyətinin cəmiyyətdə təşviqi, regionlarda mediasiya xidmətlərinin əhəmiyyəti mövzuya daxil edilib.
Çıxışlarda qeyd olunub ki, mediasiya təkcə hüquqi mexanizm deyil, eyni zamanda cəmiyyətdə barış, dialoq və sosial həmrəyliyi gücləndirən vasitədir.
Tədbir çərçivəsində mediasiya fəaliyyətinə dəstək göstərən qurumlara plaket və hədiyyələr təqdim olunub. Mərasim Quba 1 saylı Mediasiya Təşkilatının bağlanış nitqi və xatirə foto çəkilişi ilə yekunlaşıb.
