BAKI, AzerVoice
27 avqust 2025-ci il tarixində Quba 1 saylı Mediasiya Təşkilatının təşəbbüsü ilə Quba ASAN Xidmət Mərkəzində ASAN Könüllülərinin iştirakı ilə “Gələcəyin Dialoqu” adlı maarifləndirici tədbir keçirildi.
AzerVoice xəbər verir ki, tədbirin məqsədi gəncləri mediasiya prosesi ilə tanış etmək, mübahisələrin məhkəməyə qədər sülh yolu ilə həllinin əhəmiyyətini vurğulamaq və gənclərin dialoq mədəniyyətini təcrübə vasitəsilə mənimsəməsinə şərait yaratmaq idi.
Görüş zamanı iştirakçılara Quba 1 saylı Mediasiya Təşkilatının direktoru hüquqşünas mediator Hümmət Əliyev mediasiyanın mahiyyəti, prinsipləri, məhkəmə mübahisələrindən fərqli cəhətləri barədə məlumat verildi. Daha sonra könüllülər təlim xarakterli praktiki məşğələlərdə iştirak etdilər. Dörd fərqli qrup bölgüsündə təqdim olunan case-lər əsasında könüllülər mediator və tərəflər rolunda çıxış edərək mübahisələrin həllinə dair real ssenariləri sınadılar.
Təlimin sonunda iştirakçılar vurğuladılar ki, mediasiya yalnız mübahisələrin həlli deyil, həm də qarşılıqlı anlaşma, hörmət və sülh mədəniyyətinin formalaşmasına xidmət edən bir prosesdir.
Quba 1 saylı Mediasiya Təşkilatı bildirir ki, bu cür maarifləndirici tədbirlər gələcəkdə də davam etdiriləcək və gənclərin mediasiya üzrə bilik və bacarıqlarının inkişafına dəstək göstəriləcək.
“Gələcəyin Dialoqu” tədbiri bir daha sübut etdi ki, sülh və dialoq mədəniyyətinin daşıyıcıları məhz gənclərdir.
