BAKI,AzerVoice
Qırğızıstanın Nazirlər Kabineti sədrinin birinci müavini Daniyar Amanqeldiyev Böyük Britaniya və Şimali İrlandiyanın Qırğızıstandakı səfiri Nikolas Bovler ilə görüşüb.
AzerVoice xəbər verir ki, görüşdə tərəflər Qırğız-Britaniya əməkdaşlığının cari vəziyyəti və inkişafının gələcəyi barədə müzakirələr aparıb, ikitərəfli maraq doğuran məsələləri müzakirə ediblər.
Tərəflər iki ölkə arasındakı qarşılıqlı əlaqələrin müsbət dinamikasının davam etdiyini vurğulayıblar.
Nazirlər Kabineti sədrinin birinci müavini, Qırğızıstanın Nazirlər Kabineti ilə Böyük Britaniyanın "United Concrete Canvas" şirkəti arasında 6 fevralda Qırğızıstanda sement-kompozit materialların istehsalı ilə bağlı müasir zavodun tikilməsi haqqında imzalanan razılaşmanı Qırğız-Britaniya əlaqələrinin mühüm hadisələrindən biri kimi qeyd edib.
Daniyar Amanqeldiyev bildirib ki, bu investisiya layihəsinin həyata keçirilməsi iki ölkənin qarşılıqlı faydalı əməkdaşlığının parlaq nümunəsi olacaq və Qırğızıstanın sənayesinin inkişafına töhfə verəcək.
Səfir Nikolas Bovler isə Qırğızıstan və Tacikistan arasında sərhədlərin delimitasiyası məsələsinin uğurlu və tarixi həlli ilə bağlı Qırğız tərəfini təbrik edərək, bunun bölgədəki sabitlik və təhlükəsizliyin möhkəmlənməsi baxımından mühüm bir mərhələ olduğunu qeyd edib.
Bundan əlavə, səfir Böyük Britaniyanın İxrac Kredit Agentliyinin regional rəhbəri Şebne Alp başçılıq etdiyi nümayəndə heyətinin Bişkekə işgüzar səfəri haqqında məlumat verib. Nikolas Bovler, səfər zamanı tərəflərin ciddi müzakirələr aparacağı və birgə investisiya layihələrinin həyata keçirilməsi mexanizmlərini geniş şəkildə müzakirə edə biləcəklərinə inandığını ifadə edib.