BAKI, AzerVoice
ABŞ prezidenti Donald Tramp Qətərdə dəyəri ən azı 1,2 trilyon dollar olan iqtisadi əməkdaşlıq üçün bir saziş imzalayıb.
AzerVoice xəbər verir ki, bu barədə Ağ Ev məlumat yayıb.
Məlumata görə, "Boeing" təyyarələrinin və "GE Aerospace" mühərriklərinin "Qatar Airways" şirkətinə satışını da əhatə edən bu əməkdaşlıq çərçivəsində ABŞ və Qətər arasında ümumi dəyəri 243,5 milyard dolları keçən iqtisadi razılaşmalar əldə olunub.
Qətərdə bağlanmış sazişlərin bəziləri ilə bağlı detallarda qeyd olunur ki, "Boeing" və "GE Aerospace", "Qatar Airways"dən 96 milyard dollar dəyərində sifariş alıb. Bu razılaşma ABŞ istehsalı olan "GE Aerospace" mühərrikləri ilə təchiz olunmuş 210 ədəd "Boeing 787 Dreamliner" və "777X" təyyarəsinin alınmasını əhatə edir.
Qeyd edək ki, bu, "Boeing"in indiyədək aldığı ən böyük genişgövdəli təyyarə sifarişi və ən böyük "787" sifarişi kimi tarixə düşüb. Bu sazişin istehsal və təhvil prosesi ABŞ-da illik 154 min olmaqla ümumilikdə 1 milyondan çox iş yeri yaradacaq.