BAKI,VOA, Fərid Mikayılov
Qazaxıstan Yaxın Şərq ölkələrindən vətəndaşlarının təxliyəsini davam etdirir.
VOA xəbər verir ki, Qazaxıstan Xarici İşlər Nazirliyinin məlumatına görə, dövlət qurumları və diplomatik nümayəndəliklərin dəstəyi ilə 9 min 517 Qazaxıstan vətəndaşı Yaxın Şərqdən təxliyə olunaraq ölkəyə qaytarılıb.
Bildirilib ki, hazırda Birləşmiş Ərəb Əmirlikləri, Qətər və Səudiyyə Ərəbistanından vətəndaşların təxliyəsi davam edir.
Eyni zamanda Bəhreyn, İsrail, İordaniya, İran, Küveyt, Livan və Oman ölkələrindən həyata keçirilən təxliyə əməliyyatlarının isə yekun mərhələdə olduğu qeyd olunub.
Qazaxıstan Xarici İşlər Nazirliyi vətəndaşlara müraciət edərək regiondakı vəziyyət sabitləşənə qədər Yaxın Şərq ölkələrinə səfər planlaşdırmamağı tövsiyə edib.
Məlumata görə, Qazaxıstanın diplomatik nümayəndəlikləri təxliyə prosesi zamanı vətəndaşlarla əlaqəni davam etdirir, yerli əməliyyatları koordinasiya edir və zəruri dəstək göstərir.