BAKI,VOA

ABŞ Qida və Dərman Administrasiyası (FDA) 23 avqust 2021-ci ildə Pfizer-BioNTech şirkətinin COVID-19 vaksininə 16 yaş və yuxarı şəxslər üçün tam təsdiq verib.

Qərar şirkətin genişləndirilmiş klinik sınağının və istehsal prosesinin qiymətləndirilməsindən sonra qəbul edilib. Təxminən 44 min nəfərin iştirak etdiyi sınaqlarda vaksinin COVID-19-un qarşısının alınmasında 91 faiz effektiv olduğu müəyyənləşdirilib.

Pfizer-BioNTech vaksini FDA tərəfindən tam təsdiq alan ilk COVID-19 vaksini olub. Vaksinin 5-11 yaşlı uşaqlarda istifadəsi isə həmin ilin oktyabrında təsdiqlənib.

Bundan əvvəl, 2020-ci ilin dekabrında FDA koronavirus pandemiyasının yaratdığı fövqəladə ictimai sağlamlıq vəziyyəti ilə əlaqədar vaksinin təcili istifadəsinə icazə vermişdi. Bu mərhələdə 37 mindən çox iştirakçının yer aldığı randomizə edilmiş və plasebo nəzarətli araşdırmanın təhlükəsizlik məlumatları nəzərdən keçirilib.

FDA-nın tam təsdiqi COVID-19-un yüksək yoluxuculuğu ilə seçilən delta variantının ABŞ-da geniş yayıldığı dövrə təsadüf edib. Qərardan sonra bir sıra dövlət və özəl qurumlar işçilər üçün peyvənd tələbləri tətbiq etməyə başlayıb. Onların arasında Pentaqon və Nyu-York şəhərinin məktəb sistemi də olub.