BAKI,VOA,Yusif Şərifzadə

İran və ABŞ arasında əldə olunan razılaşma ilə bağlı müzakirələr davam edərkən, Vaşinqtonun təqdim etdiyi məlumatlarla Tehranın açıqlamaları arasında fərqlər diqqət çəkməyə başlayıb.

VOA xəbər verir ki, müşahidəçilərin diqqət çəkdiyi əsas məqamlardan biri İran Xarici İşlər Nazirliyinin ABŞ tərəfindən İrana hər hansı maliyyə vəsaiti ödənilmədiyini bildirməsi olub.

Bu açıqlama ABŞ administrasiyasının son günlərdə ön plana çıxardığı bəzi arqumentlərlə ziddiyyət təşkil edir.

Digər diqqət çəkən məqam isə İran tərəfinin ABŞ-yə etibar etmədiyini açıq şəkildə bəyan etməsi olub.

Mütəxəssislərin fikrincə, məhz bu məsələ danışıqlar prosesinin ən həssas və mürəkkəb tərəflərindən biridir.

Vaşinqton razılaşmanı ABŞ üçün mühüm diplomatik uğur kimi təqdim etməyə çalışır və bunun əvvəlki razılaşmalardan daha sərfəli olduğunu vurğulayır.

Lakin ABŞ-də həm iqtidara yaxın dairələrdə, həm də müxtəlif siyasi qruplar arasında razılaşmanın detalları ilə bağlı suallar səslənməkdədir.

Tənqidçilər hesab edirlər ki, 106 gün davam edən qarşıdurmadan sonra əldə olunan nəticələrin əvvəlki razılaşmalarla müqayisədə nə dərəcədə üstün olduğu hələ tam aydın deyil.