BAKI,VOA Nailə Babazadə

ABŞ Prezidenti Donald Trampın İranın limanlarına qarşı tətbiq edilən dəniz blokadasının müddətini uzatmaq barədə məsləhətçilərinə tapşırıq verməsi həm regional hərbi gərginliyi, həm də qlobal enerji bazarlarını yeni mərhələyə daşıyıb.

VOA xəbər verir ki,"Wall Street Journal"ın (WSJ) ABŞ rəsmilərinə istinadən yaydığı məlumata görə, Tramp bu addımla Tehranı nüvə proqramında ciddi güzəştlərə məcbur etmək və ölkənin iqtisadi resurslarını tamamilə tükəndirmək niyyətindədir. Ağ Ev rəhbərinin birbaşa hərbi toqquşma və ya hava hücumları əvəzinə uzunmüddətli blokadaya üstünlük verməsinin əsas səbəbi, bu üsulun digər hərbi variantlarla müqayisədə daha az riskli hesab olunmasıdır. Belə ki, Vaşinqton İranın neft gəlirlərini kəsməklə yanaşı, dəniz trafiki üzərindəki nəzarəti artıraraq limanlara giriş-çıxışı minimuma endirməyi hədəfləyir.

Bu xəbər dünya bazarında dərhal reaksiya doğurub və neft qiymətlərində kəskin artıma səbəb olub. Brent markalı neftin qiyməti 5%-dən çox artaraq 109,95 dollara, ABŞ-ın yüngül nefti (WTI) isə 105,12 dollara yüksəlib. Regionda gərginliyin artması və Hörmüz boğazı ətrafındakı hərbi aktivlik Pakistanın vasitəçiliyi ilə aparılan diplomatik səylərin uğursuzluğa uğradığı bir vaxtda qlobal enerji təhlükəsizliyi ilə bağlı narahatlıqları daha da dərinləşdirir. ABŞ Mərkəzi Komandanlığı (CENTCOM) aprelin 13-dən etibarən İran limanlarına qarşı hərbi nəzarəti gücləndirərək blokada xəttini qorumağa davam edir.