BAKI,VOA,Yusif Şərifzadə

İsrailin ABŞ-də keçmiş səfiri Alon Pinkas hesab edir ki, ABŞ-nin vitse-prezidenti Ceyms Devid Vensin İsrailin ABŞ–İran danışıqlarına mane olmağa çalışdığı barədə açıqlamaları iki ölkə arasındakı münasibətlərdə yeni mərhələnin başlanğıcını göstərə bilər.

VOA xəbər verir ki, Alon Pinkas bu fikirləri "Əl-Cəzirə" telekanalına müsahibəsində səsləndirib.

Onun sözlərinə görə, vəzifədə olan ABŞ vitse-prezidentinin İsraili açıq şəkildə ABŞ siyasətini zəiflətməyə yönəlmiş kampaniya aparmaqda ittiham etməsi əvvəllər görünməmiş hadisədir.

Pinkas bildirib ki, ABŞ ilə İsrail arasında keçmişdə də fikir ayrılıqları və gərginliklər yaşanıb, lakin indiyədək heç bir vitse-prezident bu mövzuda belə sərt və açıq bəyanat verməyib.

Keçmiş səfir Vensin açıqlamalarını "çox təəccüblü" adlandırıb.

Onun fikrincə, baş verənlər Vaşinqton və Təl-Əvivin hazırda İran siyasəti məsələsində eyni mövqedən çıxış etmədiyini göstərir.

Pinkas əlavə edib ki, İrana qarşı müharibə fonunda ABŞ ilə İsrail arasında yaranan fikir ayrılıqları İsrail baxımından ciddi narahatlıq doğurur.

Onun sözlərinə görə, bu proses iki ölkə arasındakı münasibətlərdə "struktur dəyişikliyi"nin əlaməti ola bilər.

Qeyd edək ki, bu qiymətləndirmələr Alon Pinkasın şəxsi təhlilidir və rəsmi mövqeni əks etdirmir.