BAKI,VOA, Nailə Babazadə

İranın Birləşmiş Millətlər Təşkilatındakı (BMT) daimi nümayəndəsi Əmir Səid İrəvani ABŞ-ın Hörmüz boğazındakı dəniz blokadası cəhdinin beynəlxalq hüquqa zidd və açıq təcavüz aktı olduğunu bildirib.

VOA xəbər verir ki, BMT Baş Assambleyasında çıxış edən İrəvani Rusiya və Çinin Hörmüz boğazında naviqasiya azadlığı ilə bağlı qətnamə layihəsinə veto qoymasını "haqlı və zəruri" addım kimi qiymətləndirib.

İrəvani qeyd edib ki, sözügedən layihə ABŞ və İsrailin 28 fevralda İrana qarşı başlatdığı hücumları görməzdən gəlirdi və onun qəbul edilməsi sahil dövlətlərinin suveren hüquqlarını sarsıda bilərdi. O, İranın Hörmüz boğazından hərbi məqsədlər üçün istifadənin qarşısını almaq məqsədilə qanuni tədbirlər gördüyünü müdafiə edərək ABŞ-ın blokada elanının İranın ərazi bütövlüyünün ciddi şəkildə pozulması olduğunu vurğulayıb.

Daimi nümayəndə bölgədəki müharibənin dayandırılması üçün Türkiyə, Pakistan, Misir və Səudiyyə Ərəbistanı, həmçinin Çin və Rusiyanın diplomatik səylərini dəstəklədiklərini bildirib. O, ABŞ-ın diplomatiyaya dəfələrlə xəyanət etməsinə baxmayaraq, İranın xoş niyyətlə danışıqlara girdiyini və ehtiyatlı nikbinlik içində olduğunu qeyd edib.