BAKI, VOA, Nailə Babazadə

ABŞ Prezidenti Donald Tramp İranla davam edən müharibənin iki-üç həftə ərzində başa çata biləcəyini və Tehranın bunun üçün mütləq yeni bir saziş imzalamasına ehtiyac olmadığını bəyan edib.

VOA xəbər verir ki, lakin İranın xarici işlər naziri Abbas Əraqçi "Al Jazeera" telekanalına müsahibəsində Vaşinqtonla mesaj mübadiləsinin aparıldığını təsdiqləsə də, rəsmi Tehranın ABŞ-a etimadının "sıfır" olduğunu və hazırda heç bir real danışıqların getmədiyini bildirib. Diplomatik çıxılmaz vəziyyət fonunda ABŞ və İsrailin İranın daxili bölgələrinə, o cümlədən sənaye və mülki obyektlərinə zərbələri davam edir.

İranın rəsmi mənbələri və Qırmızı Aypara Cəmiyyətinin məlumatına görə, son hücumlar zamanı Tehran, İsfahan, Şiraz, Əhvaz və Bəndər-Abbas kimi böyük şəhərlərdə partlayışlar qeydə alınıb. Tehrandakı "Tofigh Daru" əczaçılıq müəssisəsinin xammal bölməsinin və tədqiqat mərkəzinin bombalanması ölkənin milli tibbi təchizat zəncirinə ağır zərbə vurub. Hörmüzqan vilayətinin rəsmisi Əhməd Nəfisi isə Bəndər-Abbas şəhərindəki Şəhid Haqqani sərnişin limanına endirilən zərbələri "cinayət" adlandıraraq, mülki infrastrukturun hədəf alındığını pisləyib. Həmçinin Hörmüz boğazında yerləşən Qeşm adasındakı şirinləşdirmə zavodunun sıradan çıxması bölgədə su təminatını iflic edib.

Müharibənin miqyası təkcə İranla məhdudlaşmır; İsrailin müdafiə naziri İsrail Katz Cənubi Livandakı evlərin söküləcəyini və yüz minlərlə didərgin düşmüş livanlının geri qayıtmasına icazə verilməyəcəyini açıqlayıb. İndiyədək 2000-dən çox İran vətəndaşının həlak olduğu, minlərlə məktəb, universitet və xəstəxananın dağıdıldığı bildirilir. Analitik Trita Parsi hesab edir ki, Trampın müharibədən asanlıqla çıxması və Hörmüz boğazının qısa müddətdə yenidən açılması real görünmür, çünki İran strateji su yolları üzərində nəzarəti saxlamaq üçün müqaviməti davam etdirəcək.