BAKI, VOA, Nailə Babazadə
İran SEPAH-ın Hərbi Dəniz Qüvvələri gəmidən atılan "Seyyad 3-G" raketini ilk dəfə sınaqdan keçirib.
VOA xəbər verir ki, İran İslam İnqilabı Keşikçiləri Korpusunun (SEPAH) Hərbi Dəniz Qüvvələri ötən günlərdə keçirilən "Hürmüz Boğazı Ağıllı Nəzarət" təlimində gəmi bazalı "Seyyad 3-G" hava hücumundan müdafiə raketini ilk dəfə sınaqdan keçirib.
İnqilab Keşikçiləri Korpusu qurudan atılan "Seyyad 3" hava hücumundan müdafiə sisteminin gəmi versiyası olan "Seyyad 3-G"nin "Şəhid Seyyad Şirazi" gəmisindən atıldığı görüntüləri paylaşıb.
Şaquli atış (VLS) xüsusiyyətinə malik 150 kilometr mənzilli "Seyyad 3-G"nin "Şəhid Süleymani" sinfinə məxsus gəmilər üçün regional hava hücumundan müdafiə qalxanı yaratmaq imkanı verdiyi bildirilir.
Müstəqil hədəf təyini və hücum qabiliyyətinə malik olduğu qeyd edilən bu sistemin inteqrasiya olunmuş komanda və idarəetmə şəbəkəsinə qoşula bildiyi və gəmilərin hava təhlükələrinə qarşı imkanlarını artırdığı vurğulanıb.
İran istehsalı olan "Seyyad 3" adlı uzun mənzilli hava hücumundan müdafiə raketlərinin (quru versiyası) ilki 28 dekabr 2016-cı ildə sınaqdan keçirilmişdi. 120 kilometr mənzilə malik "Seyyad 3" raketi 6 metr uzunluğa və 900 kiloqram çəkiyə malikdir.
"Hürmüz Boğazı Ağıllı Nəzarət" təlimi 16 fevralda başlamış və 3 gün davam etmişdi.