BAKI, VOA, Nailə Babazadə

Pakistanın şimal-qərbindəki Xeybər-Paxtunxva (XP) əyalətində təhlükəsizlik qüvvələrinin avtomobilini hədəf alan kamikadze hücumu nəticəsində biri zabit olmaqla iki nəfər həlak olub, bir neçə nəfər isə yaralanıb.

VOA xəbər verir ki, yerli polis rəsmisinin verdiyi məlumata görə, kamikadze partlayıcı yüklü motosikletini XP əyalətinin Bannu rayonunun Sara-Darqa bölgəsində təhlükəsizlik qüvvələrinə məxsus zirehli avtomobilə çırpıb. Adının açıqlanmasını istəməyən rəsmi şəxs "Arab News"a bildirib ki, partlayış nəticəsində zirehli maşına ciddi ziyan dəyib, ölənlər və yaralananlar var.

Hələlik heç bir qruplaşma hücuma görə məsuliyyəti üzərinə götürməsə də, Pakistan Talibanı (Təhrik-e-Taliban Pakistan - TTP) keçmişdə regionda oxşar hücumlar həyata keçirib. Rəsmi orqanlar bu hadisənin arxasında da TTP-nin dayandığından şübhələnirlər.

Son illərdə Pakistan Əfqanıstanla həmsərhəd olan Xeybər-Paxtunxva əyalətində artan silahlı fəallığın qarşısını almaqda çətinlik çəkir. Xüsusilə TTP başda olmaqla silahlı qruplaşmalar bölgədə tez-tez təhlükəsizlik qüvvələrini, hüquq-mühafizə orqanlarını və dövlət rəsmilərini hədəf alır.

Bu həftənin əvvəlində Pakistan ordusunun media qanadı tərəfindən verilən məlumata görə, XP-nin Bacaur rayonunda silahlılar partlayıcı yüklü avtomobillə təhlükəsizlik qüvvələrinin birgə nəzarət məntəqəsinə hücum edib. Həmin hadisədə 11-i təhlükəsizlik əməkdaşı olmaqla 12 nəfər həyatını itirmişdi.

İslamabad Əfqanıstanı öz ərazisindən Pakistana qarşı istifadəyə şərait yaratmaqda, Hindistanı isə transsərhəd hücumlar üçün silahlı qrupları dəstəkləməkdə ittiham edir. Həm Kabul, həm də Yeni Dehli bu ittihamları rədd edir.