BAKI, AzerVoice, Nailə Babazadə
BMT cümə aqşamı günü yaydığı bəyanatda İsrailin intensiv hücumları və fələstinli mülki şəxslərin məcburi köçürülməsi nəticəsində Qəzza zolağı və İordan çayının qərb sahilində (Qərbi Şəria) "etnik təmizləmə" baş verməsi ehtimalından ciddi narahatlığını ifadə edib.
AzerVoice xəbər verir ki, bu haqda BMT-nin İnsan Hüquqları üzrə Ali Komissarlığının hesabatında deyilir.
"İntensiv hücumlar, bütün məhəllələrin sistematik şəkildə dağıdılması və humanitar yardımın qarşısının alınması Qəzzada qalıcı demoqrafik dəyişiklik yaratmaq məqsədi daşıyır." Hesabatda həmçinin vurğulanır ki,bu hərəkətlər fələstinlilərin daimi olaraq didərgin salınması məqsədi güdür və bu, həm Qəzzada, həm də İordan çayının qərb sahilində etnik təmizləmə ilə bağlı ciddi suallar doğurur.-deyə hesabatda qeyd olunub.
BMT-nin Baş katibinin müavini Rozmari Dikarlo Təhlükəsizlik Şurasının iclasında bildirib ki, İsrailin fələstinli idarəçiliyində olan ərazilər üzərində nəzarəti gücləndirmək addımları "tədricən faktiki ilhaq" (de facto annexation) səviyyəsinə çatıb. İsrail hökumətinin ultra-sağçı nazirlər tərəfindən dəstəklənən yeni qərarları 1993-cü il Oslo razılaşmaları ilə müəyyən edilmiş fələstinli muxtariyyətini sarsıdır.
Dikarlonun sözlərinə görə, bu tədbirlər icra olunarsa, işğal altındakı ərazilərdə, xüsusən də Hebron (Əl-Xəlil) kimi həssas bölgələrdə İsrail mülki hakimiyyətinin təhlükəli genişlənməsi baş verəcək.
Bürokratik maneələr aradan qaldırılmaqla yəhudi məskunlaşma yerlərinin genişləndirilməsi, torpaq alışının asanlaşdırılması və tikinti icazələrinin verilməsi sürətlənəcək.
Oslo razılaşmalarına əsasən, İordan çayının qərb sahili üç zonaya (A, B və C) bölünmüşdü. Bu ərazilərin gələcəkdə müstəqil Fələstin dövlətinin əsas hissəsini təşkil etməsi nəzərdə tutulurdu. Lakin İsrailin radikal sağçı cinahı bu torpaqları "İsrail torpağı" hesab edir.
Çərşənbə günü BMT-dəki 85 ölkənin missiyası birgə bəyanat yayaraq, İsrailin bu birtərəfli qərarlarını kəskin şəkildə qınayıb. Bəyanatda İsrailin işğal olunmuş ərazilərdəki qanunsuz mövcudluğunu genişləndirməyə yönəlmiş addımları pislənilib.