BAKI, AzerVoice, Nailə Babazadə
Almaniya Xarici İşlər Naziri Yohan Vadeful Cenevrədə aparılan görüşlərdə ABŞ-ın Rusiya-Ukrayna müharibəsini sona çatdırmaq üçün hazırladığı 28 maddəlik “sülh planı”nda Avropa və NATO ilə bağlı məsələlərin çıxarıldığını açıqlayıb.
AzerVoice xəbər verir ki, Vadeful Deutschlandfunk radiosuna verdiyi açıqlamada, Avropanın və Ukraynanın iştirakının vacib olduğunu, ilk addımın atıldığını və Avropadakı maraqların qorunduğunu vurğulayıb.
O, həmçinin Ukraynanın siyasi və ərazi suverenliyinin qorunmasının önəmli olduğunu, hansı güzəştlərin və nə vaxt veriləcəyinə yalnız Ukraynanın qərar verməli olduğunu bildirib.
Nazir ABŞ-ın planın Avropa və Ukrayna tərəfindən qəbul edilməsinə çalışmasını müsbət qiymətləndirib. O, Rusiyanın müharibəni başladığını və nəticələrinə görə məsuliyyət daşıdığını qeyd edib, lakin qarşıdakı razılaşmanın detalları barədə əvvəlcədən proqnoz verməyin mümkün olmadığını bildirib.