BAKI, AzerVoice, Nailə Babazadə
ABŞ Prezidenti Donald Tramp, Qəzzada yaradılan Beynəlxalq Sabitlik Qüvvələrinin (ISF) “çox yaxın zamanda” fəaliyyətə başlayacağını açıqlayıb.
AzerVoice xəbər verir ki, Tramp bu barədə ABŞ-da keçirilən C5+1 zirvəsində, Qazaxıstan, Özbəkistan, Qırğızıstan, Türkmənistan və Tacikistan prezidentlərini qəbul etdikdən sonra verdiyi açıqlamalarda danışıb. Prezident vurğulayıb ki, Qəzzadakı atəşkəs hazırda davam edir və ABŞ region ölkələri və müttəfiqləri ilə yaxından əməkdaşlıq edir.
ISF-in məqsədinin atəşkəsi izləmək və sonra bərpa prosesini təmin etmək olduğunu deyən Tramp, “Proses çox yaxşı gedir, çox yaxın zamanda başlanacaq” ifadəsini işlədib. O, Qəzza ilə bağlı regional koalisiyaya işarə edərək, bunun “möhkəm və davamlı sülh” üçün atılmış addım olduğunu qeyd edib.
Tramp, həmçinin Qazaxıstan və digər Orta Asiya ölkələrinin Abraham Sazişlərinə qoşulmasını arzuladıqlarını və bu vasitə ilə sazişi yenidən aktivləşdirməyi planladıqlarını bildirib.
ABŞ-ın BMT Daimi Nümayəndəsi Michael Waltz da BMT Təhlükəsizlik Şurasının seçilmiş üzvləri, eləcə də Türkiyə, Misir, Qatar, Səudiyyə Ərəbistanı və BƏƏ nümayəndələrinin iştirak etdiyi toplantıda 20 maddəlik Qəzza barış planını dəstəkləyən və ISF-in səlahiyyətlərini təsdiqləyən BMT qərar layihəsinin təqdim olunduğunu açıqlayıb. Waltz planın BMT-də təsdiqlənməsini və Orta Şərqdə sülhün təmin edilməsini tarixi fürsət adlandırıb.
Qərarın oylanacağı tarix hələ müəyyən edilməyib.