BAKI, AzerVoice, Nailə Babazadə

İran Prezidenti Məsud Pezeşkian paytaxt Tehran üçün ciddi su qıtlığı xəbərdarlığı edib. Prezident bildirib ki, yaxın günlərdə yağış yağmasa, gələn aydan etibarən şəhərdə su kəsintiləri tətbiq olunacaq. Əgər bu tədbirlər də kifayət etməzsə, Tehranı boşaltmaq məcburiyyətində qalacaqlarını deyib.

AzerVoice xəbər verir ki, İtimad qəzetinin məlumatına görə, Prezident bu açıqlamanı ölkənin qərbində yerləşən Sənəndəc şəhərində keçirdiyi görüş zamanı səsləndirib. O, çıxışında həm iqtisadi, həm də sosial problemlərə toxunaraq, qiymət artımı və inflyasiyanın həm yanlış daxili qərarların, həm də sanksiyaların nəticəsi olduğunu vurğulayıb.

“Yağış yağmazsa, gələn aydan etibarən Tehranda su məhdudlaşdırmasına gedəcəyik. Bundan sonra da yağış olmazsa, suyumuz tükənəcək və Tehranı təxliyə etməyə məcbur olacağıq,” – deyə Pezeşkian bildirib.

Pezeşkian həmçinin ölkədəki quraqlığın ciddi təhlükə yaratdığını bildirib.

Prezident su və enerji sərfiyyatında qənaətə, eləcə də daha səmərəli idarəetməyə ehtiyac olduğunu vurğulayıb.

Tehrana su əsasən Əmir Kəbir, Lar, Məmlu, Talekan və Latyan su anbarlarından təmin olunur. Lakin son illərdə ölkə üzrə yağıntıların kəskin azalması bu anbarlardakı su səviyyəsini son yüz ilin ən aşağı həddinə endirib.

Hava müşahidə xidmətlərinin məlumatına görə, bu il Tehranda yağıntıların miqdarı mövsüm normasından təxminən 40 faiz az olub. Yaz və yay aylarında demək olar ki, yağış yağmayıb, nəticədə həm səth, həm də yeraltı su ehtiyatları ciddi şəkildə azalıb.

Tehran Su İdarəsinin məlumatına əsasən, hazırkı vəziyyət davam edərsə, şəhərin su ehtiyatları cəmi iki həftəlik dövr üçün kifayət edə bilər.