BAKI, AzerVoice, Nailə Babazadə

İslam Əməkdaşlıq Təşkilatı (İƏT) İsrail parlamentində fələstinli məhbusların edamını leqallaşdıran qanun layihəsinin irəli sürülməsini kəskin şəkildə pisləyib. Qurum bunun beynəlxalq humanitar hüquqa, Cenevrə Konvensiyalarına və əlaqədar BMT qərarlarına açıq ziddiyyət təşkil etdiyini bildirib.

AzerVoice xəbər verir ki, Ciddədə yerləşən baş katiblikdən yayılan bəyanatda İƏT qanun layihəsini “irqçi və tamamilə qanunsuz” adlandıraraq, beynəlxalq ictimaiyyəti öz hüquqi və mənəvi məsuliyyətini yerinə yetirməyə, İsrailin davam edən insan haqları pozuntularını dayandırmağa çağırıb. Təşkilat, fələstinlilərə beynəlxalq müdafiənin təmin edilməsinin vacibliyinə diqqət çəkib.

Bu bəyanat İsrail Knessetinin Milli Təhlükəsizlik Komitəsinin fələstinli məhbusların israillilərə qarşı həyata keçirilən hücumlarda günahkar bilinməsi halında edam edilməsinə imkan verən qanun layihəsini təsdiqləməsindən bir neçə gün sonra səsləndirilib. Layihə ifrat sağçı Təhlükəsizlik naziri İtamar Ben-Qvir tərəfindən irəli sürülüb və Baş nazir Benyamin Netanyahu tərəfindən dəstəklənib. Sənəd gələn həftə Knessetin birinci oxunuşuna çıxarılacaq.

Hökumətin girov və itkinlər üzrə koordinatoru Qal Hirş əvvəlcə sənədə qarşı çıxsa da, Qəzzadan üç israilli hərbçinin cəsədlərinin geri qaytarılması ilə bağlı hadisədən sonra mövqeyini dəyişərək qanun layihəsini dəstəklədiyini açıqlayıb. Ben-Qvir isə bəyan edib ki, bu qanun qəbul olunarsa, məhkəmələrdə heç bir diskresiya səlahiyyəti olmayacaq və hökm avtomatik olaraq tətbiq ediləcək.

Qanun layihəsinə görə, israillinin milli və ya irqi nifrət zəminində öldürülməsində ittiham olunan hər bir şəxs barədə məhkəmə çoxluq səsi ilə edam hökmü çıxara biləcək. Hökm gələcəkdə dəyişdirilə və ya yüngülləşdirilə bilməyəcək.

İƏT bəyan edib ki, belə qanunlar İsrail hökumətinin radikal siyasətinin növbəti göstəricisidir və bölgədə vəziyyəti daha da gərginləşdirəcək. Qurum xatırladıb ki, bu cür addımlar sülh prosesini tam şəkildə iflic edir və regionda sabitliyi təhlükə altına qoyur. Təşkilat yenidən beynəlxalq müdaxiləyə çağırış edib.