BAKI, AzerVoice, Nailə Babazadə

Əfqanıstanın şimalında baş verən 6,3 bal gücündə zəlzələdə ilkin məlumata görə azı 9 nəfər həyatını itirib. Zəlzələ anları isə təhlükəsizlik kameralarına əks olunub.

AzerVoice xəbər verir ki, Əfqanıstan Milli Fəlakət İdarəetmə Agentliyinin açıqlamasında zəlzələnin episentrinin ölkənin şimalında yerləşən Samangan vilayəti olduğu bildirilib.

Açıqlamada qeyd olunub ki, ilkin məlumatlara əsasən, zəlzələ nəticəsində ən azı 9 nəfər həlak olub, 143 nəfər yaralanıb. Rayonlarda dağıntıların qiymətləndirilməsi davam edir, zəlzələ anlarını əks etdirən görüntülər isə sosial mediada paylaşılıb.

Qeyd edək ki, ABŞ Geoloji Araşdırmalar Mərkəzi (USGS) dünən Əfqanıstanın şimalındakı Bəlx vilayətinin Hulm bölgəsində, yerin 10 kilometr dərinliyində 6,3 bal gücündə zəlzələ baş verdiyini açıqlamışdı.

Əfqanıstanın şərqində, Pakistan sərhədi yaxınlığında, 31 avqust bazar gecəsi 6 bal gücündə zəlzələ olmuşdu. Həmin zəlzələdə 2 min 205 nəfərin həlak olduğu, 3 min 640 nəfərin yaralandığı bildirilmişdi.

USGS, 2 sentyabrda yenidən Cəlalabad şəhərinin 34 kilometr şimal-şərqində 5,2 bal gücündə zəlzələ qeydə alındığını da açıqlamışdı.