BAKI, AzerVoice, Nailə Babazadə

Birləşmiş Millətlər Təşkilatının Qaçqınlar üzrə Ali Komissarlığı (UNHCR) bildirib ki, cari ilin əvvəlindən etibarən təxminən 300 min suriyalı qaçqın Livandan öz vətəninə qayıdıb.

AzerVoice xəbər verir ki, Anadolu xəbər agentliyinə müsahibəsində UNHCR-in ictimai məlumat üzrə rəsmisi Liza Abu Xalid qeyd edib ki, qurum Livandan Suriyaya könüllü qayıdış proqramını həyata keçirməkdə davam edir. Bu proqram, öz ölkəsinə dönmək istəyən şəxsləri dəstəkləməklə yanaşı, onların qayıtdıqdan sonra cəmiyyətə inteqrasiyasını təmin etmək üçün zəruri yardımı da nəzərdə tutur.

O, Tartus əyalətinin kənd bölgəsində yerləşən əl-Arida sərhəd-keçid məntəqəsindən 400 suriyalı qaçqının Homs və İdlib şəhərlərinə doğru hərəkət etdiyini bildirib. Bu, könüllü qayıdış proqramının altıncı mərhələsi çərçivəsində həyata keçirilib.

Qeyd edək ki, iyulun 29-da UNHCR-in Suriyadakı sözçüsü Selin Şmitt Livandan Suriyaya birinci könüllü qayıdış karvanının yola salındığını açıqlamışdı. Bu karvan Livandakı UNHCR ofisi və Suriyanın Quru və Dəniz Limanları üzrə Baş İdarəsi ilə birgə əlaqələndirilmişdi.