BAKI, AzerVoice, Nailə Babazadə

Almaniyanın müdafiə sənayesi nəhəngi Rheinmetall, Aşağı Saksonya əyalətinin Unterlüß bölgəsində Avropanın ən böyük sursat istehsal zavodunun açılışını həyata keçirib.

AzerVoice xəbər verir ki, cəmi 15 ay ərzində, 500 milyon avro sərmayə ilə inşa edilən zavod Avropada artan müdafiə tələbatını qarşılamaq məqsədi daşıyır və strateji əhəmiyyətə malik layihə hesab olunur.

Açılış mərasimində Almaniyanın müdafiə naziri Boris Pistorius, maliyyə naziri Kristian Lindner, NATO-nun yeni baş katibi Mark Rutte və digər rəsmilər iştirak ediblər. Müdafiə naziri Pistorius çıxışında bildirib.

“Bu zavod Almaniyanın və NATO-nun müdafiə qabiliyyətini artırmaq əzmində olduğunu nümayiş etdirir.” - deyə qeyd edib.

Zavod tam gücü ilə fəaliyyətə başladıqdan sonra hər il 350 min ədəd 155 mm-lik artilleriya mərmisi istehsal olunacaq. Rheinmetall şirkətinin baş icraçı direktoru Armin Papperger bu addımın Avropa üçün kritik əhəmiyyət daşıdığını vurğulayıb:

“Biz Avropanın müdafiə sənayesində özünütəminetməsini gücləndirmək üçün kritik bir addım atırıq.”

NATO baş katibi Mark Rutte isə Avropanın təhlükəsizliyinə yönəlmiş potensial təhdidlərə diqqət çəkərək qeyd edib:

“Avropa uzunmüddətli təhlükəsizlik arxitekturasını gücləndirmək üçün istehsal gücünü artırmaq məcburiyyətindədir.”

Rheinmetall şirkəti Almaniyadakı bu nəhəng investisiyanı Rumıniya və Litvada planlaşdırılan oxşar sursat istehsalı zavodları ilə dəstəkləməyi planlaşdırır. Şirkətin məqsədi – Avropa üzrə inteqrasiya olunmuş müdafiə istehsal şəbəkəsi qurmaqdır.