BAKI, AzerVoice, Nərmin Ağayeva

Ümumdünya Səhiyyə Təşkilatının (ÜST) baş direktoru Tedros Adhanom Ghebreyesus, İsrailin Qəzza zolağındakı Nasser xəstəxanasına hücumlarını pisləyərək, bu hücumların tibbi xidmətə məhdud çıxışı daha da çətinləşdirdiyini bildirib.

AzerVoice xəbər verir ki, Ghebreyesus sosial şəbəkədəki paylaşımında, İsrail ordusunun Xan Yunisdəki Nasser xəstəxanasına həyata keçirdiyi iki hücumda dörd səhiyyə işçisi və beş jurnalist daxil olmaqla ən azı 20 nəfərin həlak olduğunu, 50 nəfərin, o cümlədən ağır xəstələrin xəsarət aldığını qeyd edib. Hücumlar nəticəsində xəstəxananın təcili yardım və cərrahiyyə bölməsinin yerləşdiyi əsas bina və təcili yardım pilləkənləri zədələnib. Ghebreyesus, “Qəzzada insanlar aclıq çəkərkən, onların məhdud sağlamlıq imkanları təkrarlanan hücumlarla daha da çətinləşir,” deyərək səhiyyə müəssisələrinə hücumların dərhal dayandırılmasını və atəşkəs çağırışını təkrarlayıb.

Qəzza Səhiyyə Nazirliyinin məlumatına görə, hücumlarda 5-i jurnalist olmaqla 20 fələstinli həlak olub. Misir televiziyasının canlı yayımında isə ikinci hücumun, ilk hücumda ölən və yaralananları təxliyyə etməyə çalışan mülki xilasetmə qrupları ilə jurnalistləri hədəf aldığı görüntüklənib. Bu hücumlar beynəlxalq hüquqa zidd olaraq səhiyyə müəssisələrinin və jurnalistlərin qorunması öhdəliyini sual altına alıb.

Qeyd edək ki, İsrail ordusunun Nasser xəstəxanasına hücumları ÜST və digər beynəlxalq təşkilatlar tərəfindən sərt şəkildə pislənilib. Ghebreyesusun bəyanatında səhiyyə sisteminin çöküşünə səbəb olan bu cür hücumların Qəzzada humanitar böhranı dərinləşdirdiyi vurğulanıb.