BAKI, AzerVoice, Fərid Mikayılov

Kivinin həzm sisteminə faydaları Avropa İttifaqı (Aİ) tərəfindən rəsmi şəkildə təsdiqlənib.

Avropa Komissiyası “kivi istehlakının defekasiya tezliyini artıraraq normal bağırsaq funksiyasına töhfə verdiyi” yönündəki sağlamlıq iddiasına onay verib. Bu qərarla kivi, Aİ tərəfindən sağlamlıq faydaları tanınan ilk təzə meyvə statusunu qazandı.

Qərar, dünyanın ən böyük kivi ixracatçısı və bazarın üçdə birinə nəzarət edən Yeni Zelandiya mərkəzli Zespri International Limited şirkətinin müraciəti əsasında qəbul olunub. Şirkətin təqdim etdiyi, 15 ildən artıq davam edən elmi araşdırmalar gündə iki kivi istehlakının bağırsaq hərəkətlərini normallaşdırdığını ortaya qoyub.

Avropa Qida Təhlükəsizliyi Təşkilatı (EFSA) 2021-ci ildə verdiyi elmi rəydə kivi ilə həzm sisteminin fəaliyyəti arasında birbaşa səbəb-nəticə əlaqəsini təsdiqləmişdi. Komissiya bu rəy əsasında istehlakçı üçün daha aydın olan “defekasiya tezliyini artırır” ifadəsini təsdiqləyərək qərarı rəsmiləşdirdi.

Aİ-də qida məhsullarına sağlamlıq iddiası vermək ciddi elmi testlərdən keçməlidir. Son 5 ildə yalnız üç belə iddia qəbul olunub və müraciətlərin böyük əksəriyyəti rədd edilib.

Daha əvvəl qəbul edilmiş iddialar arasında “kalsium normal sümük inkişafı üçün vacibdir” və “C vitamini immunitet sisteminin normal fəaliyyətini dəstəkləyir” kimi bəyanatlar yer alıb. Lakin probiyotiklər və bir çox bitki əsaslı məhsullar hələ də Aİ tərəfindən rəsmi tanınmayıb.