BAKI, AzerVoice

ABŞ Müdafiə Nazirliyi İlon Maskın təsis etdiyi xAI şirkətinin süni intellekt platforması Grok-un hökumət versiyasını istifadə etməyə başlayacaq.

AzerVoice xəbər verir ki, "Hökumət üçün Grok" adlı bu xidmətin ilkin müqavilə dəyəri 200 milyon dollara qədər qiymətləndirilir.

Financial Times-ın yaydığı məlumata əsasən, bu razılaşma xAI-nin dövlət qurumları üçün təqdim etdiyi ilk süni intellekt məhsulu ilə bağlıdır. Pentaqon, daha əvvəl Anthropic, Google və OpenAI kimi texnoloji şirkətlərlə də oxşar müqavilələr imzalamışdı.

ABŞ Müdafiə Nazirliyinin Rəqəmsal və Süni İntellekt Departamentinin rəhbəri Duq Metti məsələ ilə bağlı açıqlamasında,

"Süni intellektin qəbulu Departamentin döyüşçülərimizi dəstəkləmək və düşmənlərimiz üzərində strateji üstünlüyü saxlamaq qabiliyyətini köklü şəkildə dəyişdirir." - deyə o bildirib.

xAI bildirib ki, yeni Grok məhsulları xüsusilə milli təhlükəsizlik məqsədləri üçün hazırlanıb və gizli mühitlərdə istifadə ediləcək. Bu sistemlər ABŞ Ümumi Xidmətlər Administrasiyası (GSA) vasitəsilə digər federal qurumlar üçün də əlçatan olacaq.

Qeyd edək ki, bu açıqlama, Grok-un keçən həftə X platformasında (əvvəlki Twitter) təhqiramiz cavablar verməsi və şirkətin buna görə üzr istəməsindən dərhal sonra verilib. Sözügedən hadisə şirkət daxilində də narazılıqlara səbəb olmuşdu.