BAKI, AzerVoice

USAID-in maliyyələşdirməsinin kəsilməsi 5 il ərzində 14 milyon ölümə səbəb ola bilər.

AzerVoice xəbər verir ki, ABŞ prezidenti Donald Trampın Dövlət Departamentinə daxil olan USAID-in maliyyələşdirilməsində ciddi ixtisarlar aparması nəticəsində 5 il ərzində qlobal miqyasda 14 milyon insanın həyatını itirə biləcəyi ilə bağlı tədqiqat aparılıb.

New York Times-a istinadla yayılan məlumatda qeyd olunur ki, Avropanın müxtəlif universitetlərindən tədqiqatçılar USAID-in ixtisarlarının aşağı gəlirli ölkələrdə insan sağlamlığına mənfi təsirlərini araşdırıblar. Tədqiqatda iki ssenari nəzərdən keçirilib: birincisi 2023-cü ildə mövcud maliyyələşdirmənin davam etməsi, ikincisi isə Tramp administrasiyasının proqramların 83 faizini ləğv etməsi.

İkinci halda 2030-cu ilə qədər əlavə 14 milyon insan, o cümlədən 4,5 milyon 5 yaşdan kiçik uşaq ölüm riski ilə üzləşə bilər. Araşdırmada USAID-in vəsaiti ayrılan ölkələrdə İİV/QİÇS, malyariya və tropik xəstəliklərdən ölüm hallarında əhəmiyyətli azalmalar qeydə alınıb.

Tədqiqatın koordinatoru Davide Rasella USAID-in maliyyələşdirilməsinin kəsilməsinin ABŞ-ın qlobal imicinə ciddi zərbə vurduğunu bildirib. Arizona Dövlət Universitetindən professor Jonas Gamso isə nəticələrin mürəkkəb faktorları nəzərə alaraq ehtiyatla qiymətləndirilməsinin vacib olduğunu vurğulayıb.

Araşdırma “The Lancet” jurnalında dərc olunub.

Qeyd edək ki, USAID (ABŞ Beynəlxalq İnkişaf Agentliyi) dünyanın ən böyük donor təşkilatlarından biridir və inkişaf etməkdə olan ölkələrdə səhiyyə, təhsil, ərzaq təhlükəsizliyi və humanitar yardım sahələrində mühüm layihələr həyata keçirir. Agentliyin maliyyələşdirməsindəki ixtisarlar xüsusilə Afrikada və aşağı gəlirli ölkələrdə həyat səviyyəsinə birbaşa təsir göstərir.