BAKI, AzerVoice

Dünyanın piyada gəzinti üçün ən əlverişli şəhərləri açıqlanıb.

AzerVoice xəbər verir ki, məşhur səyahət platforması Skyscanner dünyanın piyada ilə ən asan ziyarət edilə bilən şəhərlərinin siyahısını açıqlayıb.

Siyahı hazırlanarkən şəhərlərdəki gəzinti yollarının sayı, hava keyfiyyəti, cinayət səviyyəsi və əsas turistik məkanlar arasındakı məsafə kimi amillər əsas götürülüb. Sıralamada dünyanın müxtəlif bölgələrindən bir çox tanınmış şəhər yer alıb, o cümlədən Türkiyənin Bursa şəhəri də bu siyahıya daxil edilib.

Skyscanner mütəxəssisləri qeyd edir ki, piyada səyahət ekoloji cəhətdən daha təmiz olmaqla yanaşı, həm də şəhərləri daha yaxından və dərin şəkildə tanımaq imkanı yaradır.


Siyahının ilk sırasında İspaniyanın Kordoba şəhəri qərarlaşıb. UNESCO-nun Dünya İrs Siyahısında yer alan bu şəhərin tarixi mərkəzini piyada cəmi 26 dəqiqəyə gəzmək mümkündür.

Yaponiya – Xirosima və Naqasaki kimi şəhərlər cinayət səviyyəsinin aşağı olması və şəhər planlamasının səmərəliliyi ilə seçilirlər. Hər iki şəhər gəzinti üçün sakit və təhlükəsiz mühit təqdim edir.

İtaliya – Kalabriya və Bolzano kimi şəhərlər yaşıllıqları, liman bölgələri və dağ mənzərələri ilə həm turistlər, həm də idman həvəskarları üçün ideal məkandır. Kalabriyada əsas nöqtələrə piyada 25 dəqiqəyə, Bolzanoda isə Alp dağlarının ətəklərində gəzinti təcrübəsi yaşamaq mümkündür.

Monako – Monte Karlo orta hesabla 38 dəqiqəyə piyada ziyarət edilə bilən kiçik, lakin zəngin mədəniyyətə sahib şəhərdir. Lüks mağazalar, marinadakı yaxtalar və avtomobil muzeyləri ilə turistlərin marağını cəlb edir.

Estoniya – Tartu şəhəri çay boyunca salınmış gəzinti yolları və təmiz havası ilə seçilir. Eyni zamanda botanika bağları və parklarla zəngin mühit yaradır.

Bosniya və Herseqovina – Sarayevo şəhəri Osmanlı İmperatorluğu dövründən qalan irsi, dar küçələri və qəhvə qoxusu ilə tanınır. Şəhərin mərkəzini piyada 20 dəqiqəyə gəzmək mümkündür.

Kanada – Viktoriya şəhəri Şimali Amerikadan siyahıya düşən yeganə şəhərdir. Burada 450-dən çox gəzinti yolu mövcuddur.

Türkiyə - Bursa şəhəri Osmanlı irsi və piyada ziyarət üçün ideal məkandır

Siyahının ən sevindirici cəhəti isə Bursa şəhərinin də bu reytinqə daxil edilməsidir. İstanbuldan sonra Türkiyənin Marmara bölgəsindəki ən böyük şəhər olan Bursa zəngin tarixi, təbiəti və mədəni irsi ilə piyada ziyarət üçün əlverişli şəhərlərdən biri kimi qiymətləndirilib. Skyscanner mütəxəssisləri Bursanı , “Osmanlı mirası, canlı bazarları və təbii isti bulaqları ilə piyada kəşfiyyat üçün əla seçimdir” - belə təsvir edib.

Şəhərin ən məşhur turistik məkanları – Ulu Məscid, Osman Qazi və Orxan Qazi türbələri, Təpəbaşı, Koza Han, Qapalı Çarşı və digər tarixi obyektləri bir saata qədər bir vaxtda piyada gəzmək mümkündür. Bundan əlavə, şəhərin mərkəzindən uzaqlaşmadan həm dini, həm də ticari mərkəzlərlə tanış olmaq mümkündür.

Bu cür reytinqlər bir daha göstərir ki, şəhər planlamasında yalnız nəqliyyat və infrastruktur deyil, piyada hərəkətliliyi və yaşayış rahatlığı da əsas kriteriyalardan biri olmalıdır. Turistlər getdikcə daha çox avtomobilsiz bölgələrə və qısa məsafəli gəzintilərlə tarixi hiss edə biləcəkləri şəhərlərə üstünlük verirlər.

Qeyd edək ki, Skyscanner-in bu siyahısı həm turizm baxımından, həm də şəhərsalma sahəsində çalışanlar üçün vacib göstərici ola bilər.