BAKI,VOA Orxan Qədirzadə

Almaniyanın paytaxtı Berlində dövlət qurumlarına qarşı kiberhücum həyata keçirilib. “Resida” adlı fidyə proqramı qrupunun 5,79 terabayt həcmində məlumat oğurladığını və şəhər rəhbərliyindən fidyə tələb etdiyini açıqladığı bildirilir.

Qrupun məlumatına görə, oğurlanan məlumatlar arasında 46 500 müqavilə, elektron məktublar, telefon nömrələri, parollar və məxfi məlumatlar var. Hakerlər məlumatları 30 bitkoindən başlayan qiymətlə hərraca çıxaracaqlarını bildiriblər.

Berlin rəhbərliyi fidyə ödəməkdən imtina edib. Berlin meri Kay Veqner şəhərin “ciddi cinayətin qurbanı olduğunu” deyərək, paytaxtın şantaja boyun əyməyəcəyini bildirib.

Hücumun miqyası hələ araşdırılır. Berlin rəsmiləri seçki infrastrukturunun kiberhücumdan zərər görmədiyini və seçkilərlə bağlı məlumatların oğurlanmadığını açıqlayıb.

“Resida” qrupunun 2023-cü ilin iyunundan etibarən təxminən 280 kiberhücuma görə məsuliyyəti öz üzərinə götürdüyü bildirilir. Qrup daha əvvəl dövlət qurumları, məktəblər, səhiyyə müəssisələri və müxtəlif şirkətləri də hədəf alıb.