Almaniyanın paytaxtı Berlində dövlət qurumlarına qarşı kiberhücum həyata keçirilib. “Resida” adlı fidyə proqramı qrupunun 5,79 terabayt həcmində məlumat oğurladığını və şəhər rəhbərliyindən fidyə tələb etdiyini açıqladığı bildirilir. Qrupun məlumatına görə, oğurlanan məlumatlar arasında 46 500 müqavilə, elektron məktublar, telefon nömrələri, parollar və məxfi məlumatlar var. Hakerlər məlumatları 30 bitkoindən başlayan qiymətlə hərraca çıxaracaqlarını bildiriblər.

ABŞ Ədliyyə Nazirliyi İranla əlaqəli olduğu iddia edilən haker şəbəkəsinin 17 üzvünə qarşı yenilənmiş ittihamnamə açıqlayıb və onların beşinin yerinin müəyyənləşdirilməsinə kömək edəcək məlumat üçün 10 milyon dollar mükafat vəd edib. Nazirliyin məlumatına görə, təqsirləndirilən şəxslər İranda fəaliyyət göstərən “Mabna İnstitutu” ilə əməkdaşlıq edib və İran İslam İnqilabı Keşikçiləri Korpusu ilə digər dövlət və universitet qurumlarının adından kiberhücumlar həyata keçiriblər.

“Philips” və “Shell” şirkətləri “Cl0p” kibercinayətkar qrupunun hücumlarının hədəfinə çevrilib. “Philips” daxili məlumatlarla əlaqəli xidmət qurğusuna müdaxilə cəhdini aşkarladığını və qarşısını aldığını bildirib. Şirkət hadisənin müştərilərə xidmət göstərən sistemlərə təsir etmədiyini açıqlayıb. “Shell” isə mümkün kiberhadisəni araşdırdığını bildirib. “Cl0p” “Shell”dən təxminən 89 giqabayt məlumat ələ keçirdiyini iddia edir. Qrup “Philips”dən də təxminən 13,5 giqabayt məlumat oğurladığını bildirir. Lakin qrup indiyədək bu məlumatlardan nümunələr təqdim etməyib. Hər iki şirkət məlumatların həqiqətən oğurlandığını hələ təsdiqləməyib.

"Google" zərərli proqramların fəaliyyətində istifadə olunduğu bildirilən "NetNut" şəbəkəsinə qarşı genişmiqyaslı əməliyyat həyata keçirib. Şirkət bu addımı ABŞ Federal Təhqiqat Bürosu və digər tərəfdaşlarla birlikdə atdığını açıqlayıb. Əməliyyat zamanı zərərli proqramların idarə olunmasında istifadə edilən hesablar və xidmətlər bağlanıb. Texniki məlumatlar hüquq-mühafizə orqanları ilə bölüşdürülüb. "Google" milyonlarla cihazın artıq həmin şəbəkə tərəfindən istifadə oluna bilməyəcəyini bildirib. Şirkətin sözlərinə görə, bu addım kibercinayətkarlıqla mübarizəyə töhfə verəcək. Araşdırmalar davam etdirilir.

Baş prokuror Kamran Əliyev Qarabağ Universitetində tələbələr və müəllim heyəti üçün rəqəmsal sübutlar və elektron cinayət təqibi mövzusunda geniş mühazirə keçirib. Tədbiri açan Qarabağ Universitetinin rektoru Şahin Bayramov qonaqları salamlayıb və Qarabağ Universitetində “Hüquqşünaslıq” ixtisası üzrə kadr hazırlığına göstərilən davamlı dəstəyə görə Azərbaycan Respublikasının Baş Prokurorluğunun rəhbərliyinə təşəkkürünü bildirib.

Türkiyə Milli Kəşfiyyat Təşkilatının koordinasiyası ilə həyata keçirilən əməliyyat çərçivəsində kibercinayət şəbəkəsinə qarşı genişmiqyaslı tədbirlər görülüb. Əməliyyat Türkiyə Milli Kəşfiyyat Təşkilatı, Kibertəhlükəsizlik İdarəsi, Jandarma Baş Komandanlığı və Maliyyə Cinayətləri Araşdırma Şurasının birgə fəaliyyəti nəticəsində həyata keçirilib. Saxlanılan şəxslər arasında şəbəkənin texniki infrastrukturunu quran və idarə edən əsas fiqurun da olduğu bildirilir.

Fransada, Məktəb və Universitet İşləri üzrə Milli Mərkəz (Cnous) kiber hücuma məruz qalıb və təxminən 770 min tələbənin şəxsi məlumatları oğurlanıb. Hücum nəticəsində təxminən 770 min tələbənin məlumatlarına qanunsuz giriş təmin olunub və məsələ ilə bağlı istintaq başlanıb.

Türkiyə Prezident Administrasiyasının Kommunikasiya idarəsinin rəhbəri Burhanəddin Duran regionda baş verən son hadisələrdən sonra Türkiyəni hədəf alan dezinformasiya və psixoloji əməliyyat fəaliyyətlərinə qarşı qətiyyətli addımların atıldığını açıqlayıb. Duran bildirib ki, xüsusilə İrana qarşı hərbi əməliyyatların başladığı ilk anlardan etibarən bəzi sosial media hesabları vasitəsilə cəmiyyətdə qorxu, təşviş və inamsızlıq yaratmaq məqsədilə sistemli paylaşımlar edildiyi müəyyən olunub. Bu rəqəmsal manipulyasiya cəhdlərinin qarşısını almaq məqsədilə daxili cəbhəni hədəf alan 41 sosial media hesabına (X, Facebook və Instagram) giriş məhdudlaşdırılıb, həmçinin 75 provokativ məzmun rəqəmsal platformalardan tamamilə silinib.

Elmadağ Baş Prokurorluğu tərəfindən ictimai asayişi və maliyyə təhlükəsizliyini təhdid edən qanunsuz mərc fəaliyyətlərinə qarşı aparılan istintaq çərçivəsində 37 şübhəli şəxs yaxalanıb. Ankara Emniyyət Müdirliyi Kiber Cinayətlərlə Mübarizə Şöbəsinin əməkdaşları tərəfindən saxlanılan şübhəlilərdən prosedurları tamamlanan 30 nəfər ədliyyəyə gətirilib.

Türkiyənin Daxili İşlər Nazirliyi 15 vilayətdə keçirilən eyni vaxtlı əməliyyatlar nəticəsində 15 ayrı mütəşəkkil cinayət qrupunun zərərsizləşdirildiyini açıqlayıb. Nazirliyin yaydığı məlumatda bildirilib ki, son bir həftə ərzində həyata keçirilən genişmiqyaslı əməliyyatlar çərçivəsində ümumilikdə 140 şübhəli saxlanılıb, onlardan 80-i həbs olunub.

İstanbulda OnlyFans platformasında əxlaqsız məzmun paylaşan şəxslərə qarşı əməliyyat keçirilib. Əməliyyat zamanı 16 şübhəli saxlanılıb, onlara məxsus 2 şirkət, 10 daşınmaz əmlak və 14 nəqliyyat vasitəsi üzərinə həbs qoyulub. İstanbul Polis İdarəsinin Kibercinayətkarlıqla Mübarizə Şöbəsinin əməkdaşları İstanbul Baş Prokurorluğunun koordinasiyası ilə “Cinayət yolu ilə əldə edilmiş gəlirlərin leqallaşdırılması” və “Əxlaqsızlıq” maddələri üzrə araşdırmaya başlayıblar.

Türkiyədə kiber cinayətlərə qarşı keçirilən genişmiqyaslı əməliyyatlar nəticəsində 90 şübhəli saxlanılıb, onlardan 58-i barəsində həbs qətimkan tədbiri seçilib. Nazir bildirib ki, əməliyyatlar zamanı ümumi dövriyyə həcmi təxminən 1,1 milyard lirə olan kiber cinayət şəbəkəsi ifşa edilib. Saxlanılan şübhəlilərdən 25-i barəsində məhkəmə nəzarəti tədbirləri tətbiq olunub, digərləri üzrə isə istintaq davam etdirilir.