BAKI,VOA Orxan Qədirzadə

İsrail ordusunun Qəzza zolağında Fələstin qruplarının silahlı qanadlarının səhra komandirləri və aparıcı üzvlərinə qarşı sui-qəsd əməliyyatlarını artırdığı bildirilir. Hücumlarla yanaşı, “Sarı xətt” ətrafında mülki şəxslərə qarşı zərbələrin də intensivləşdiyi qeyd olunur.

Son günlər İsrailin pilotsuz uçuş aparatları və döyüş təyyarələri ilə həyata keçirdiyi hücumlarda HƏMAS-ın İzzəddin əl-Qəssam Briqadaları və İslami Cihadın Qüds Briqadalarının bir sıra üzvlərinin öldürüldüyü bildirilir.

Səhra mənbələrinin məlumatına görə, öldürülənlər arasında silahlı qrupların sıralarının yenidən təşkilində iştirak edən mühüm komandirlər də olub. İsrailin xüsusilə 2023-cü il oktyabrın 7-dəki hücumda iştirak etdiyi bildirilən “Nuxba” bölməsinin üzvlərini və səhra komandirlərini hədəf aldığı vurğulanır.

İsrail Baş Qərargah rəisi Eyal Zamirin Qəzzadakı hərbçilərlə görüşü zamanı HƏMAS-ın tərksilah edilməsini və 7 oktyabr hücumunda iştirak edən şəxslərin izlənilərək öldürülməsi tapşırdığı bildirilir.

Bu arada “Sarı xətt” yaxınlığında mülki şəxslərə qarşı hücumların da artdığı qeyd olunur. Xan Yunisin şimalındakı Əl-Qərara bölgəsində bir ailənin üç üzvünün İsrailə məxsus pilotsuz uçuş aparatının hücumu nəticəsində öldüyü bildirilib.

Fələstinli qruplar İsrailin sui-qəsd əməliyyatlarını xüsusilə İsraildə keçiriləcək parlament seçkiləri ərəfəsində artıracağından narahatdır. Qrupların rəhbərlərinə və üzvlərinə təhlükəsizlik tədbirlərini gücləndirmək barədə xəbərdarlıq etdiyi bildirilir.