BAKI,VOA,Yusif Şərifzadə

ABŞ və İran arasında müharibə ilə bağlı yaranmış dalan beynəlxalq bazarları və regionda sabitliyi qeyri-müəyyən vəziyyətdə saxlayır. İyunun 17-də imzalanmış Anlaşma Memorandumunun müddətinin bazar günü başa çatması gözlənilir.

VOA xəbər verir ki, böhranın əsas mərkəzində strateji əhəmiyyət daşıyan Hörmüz boğazı dayanır. Memorandumun 5-ci maddəsində boğazdan kommersiya gəmilərinin təhlükəsiz keçidinin təmin edilməsi nəzərdə tutulur.

Lakin razılaşmanın əldə olunmasından qısa müddət sonra ABŞ və İran Körfəz boyunca hərbi bazalara və digər hərbi obyektlərə qarşı zərbələri yenidən həyata keçiriblər.

Razılaşmanın müddətinin başa çatmasına az vaxt qaldığı bir vaxtda vasitəçilik səyləri də intensivləşib. Pakistan yüksək səviyyəli İran rəsmilərini danışıqlar üçün ölkəyə dəvət edib.

Pakistanın daxili işlər naziri Möhsin Nəqvi müharibənin dayandırılması və Hörmüz boğazının açılması məqsədilə İran rəsmiləri ilə müzakirələr aparmaq üçün Tehrana səfər edib.

İran isə Hörmüz boğazının yenidən açılması ilə bağlı irəli sürdüyü şərtlərdən geri çəkilmir. Tehran Vaşinqtonun hərbi əməliyyatları dayandırmasını və xaricdə saxlanılan İran vəsaitlərini azad etməsini tələb edir.

ABŞ Prezidenti Donald Tramp isə bir tərəfdən qarşıdurmanın genişləndirilməsi ilə bağlı sərt mesajlar verir, digər tərəfdən isə sülh razılaşmasının yaxın zamanda əldə olunacağına dair açıqlamalar səsləndirir.