BAKI,VOA,Yusif Şərifzadə

Kanadanın Baş naziri Mark Karni ABŞ-nin müttəfiqlərinə Beynəlxalq Cinayət Məhkəməsindən (BCM) çıxmaq və maliyyə dəstəyini dayandırmaq üçün göstərdiyi təzyiqlərə baxmayaraq, Ottavanın bu quruma dəstəyini davam etdirəcəyini bəyan edib.

VOA xəbər verir ki, Karni Kanadanın BCM-nin qürurlu üzvü olduğunu vurğulayaraq, ölkəsinin məhkəməyə maliyyə, kadr və siyasi dəstək göstərdiyini bildirib.

"Biz Beynəlxalq Cinayət Məhkəməsini maliyyələşdiririk, insan resursları ilə dəstəkləyirik, dəyərlərimiz və konkret addımlarımızla onun yanındayıq və bunu davam etdirəcəyik", – deyə o qeyd edib.

Baş nazirin sözlərinə görə, qlobal qeyri-sabitliyin artdığı bir dövrdə BCM-nin rolu daha da əhəmiyyət qazanır.

ABŞ Prezidenti Donald Tramp administrasiyası isə xüsusilə BCM-nin İsrailin Baş naziri Benyamin Netanyahu da daxil olmaqla bir sıra İsrail rəsmiləri barəsində Qəzza müharibəsi ilə bağlı həbs qərarları çıxarmasından sonra məhkəməni dəfələrlə tənqid edib.

ABŞ Roma Statutuna qoşulmayıb və bu səbəbdən BCM-nin üzvü deyil.

Xatırladaq ki, 2024-cü ildə Netanyahu barəsində müharibə cinayətləri və insanlığa qarşı cinayətlər ittihamı ilə həbs orderi verən BCM-nin sabiq baş prokuroru Kərim Xan sonradan barəsində irəli sürülən qeyri-peşəkar davranış ittihamları səbəbindən vəzifəsindən uzaqlaşdırılıb. Həmçinin, 2025-ci ilin avqustunda ABŞ Əfqanıstandakı amerikalı hərbçilərlə bağlı işə görə kanadalı BCM hakimi Kimberli Prosta qarşı sanksiyalar tətbiq edib.