BAKI,VOA,Yusif Şərifzadə

Ukrayna Prezidenti Volodimir Zelenski Rusiyanın enerji infrastrukturuna qarşı həyata keçirilən hücumlar və Moskvanın Kiyevə endirdiyi, 50-dən çox insanın həyatına son qoyan raket zərbələrindən sonra Rusiyaya qarşı təzyiqlərin artırılmasının vacibliyini bildirib.

VOA xəbər verir ki, Zelenski Ankarada NATO-nun baş katibi Mark Rütte ilə birgə keçirdiyi mətbuat konfransında Rusiyanın zəiflədiyinin hiss olunduğunu, lakin bunun kifayət etmədiyini deyib. O vurğulayıb ki, Rusiyaya qarşı daha sərt təzyiqlər göstərilməli, Ukraynaya əlavə ballistik raketlərə qarşı hava hücumundan müdafiə sistemləri verilməli və Moskvaya qarşı yeni sanksiyalar tətbiq olunmalıdır.

Ukrayna Prezidenti bildirib ki, Rusiyanın ballistik raket hücumlarının qarşısının alınması üçün ölkəsinin əlavə müdafiə vasitələrinə ehtiyacı var. O, bu məsələni NATO Zirvə Toplantısı çərçivəsində ABŞ Prezidenti Donald Trampla keçirəcəyi görüşdə müzakirə etməyi planlaşdırdığını açıqlayıb.

Zelenskinin sözlərinə görə, Ukraynanın müdafiə imkanlarının gücləndirilməsi həm ölkənin təhlükəsizliyi, həm də Avropanın ümumi sabitliyi baxımından mühüm əhəmiyyət daşıyır.