BAKI,VOA, Fərid Mikayılov

ABŞ-ın tətbiq etdiyi iqtisadi blokada və Kuba dövləti ilə əməkdaşlıq edən şirkətləri hədəf alan genişləndirilmiş sanksiyalar adadakı iqtisadi və enerji böhranını son həddə çatdırıb. Bu barədə rəsmi bəyanat yayan Kuba hökuməti, ABŞ-ın ölkəyə yönəlmiş neft blokadasının Birləşmiş Millətlər Təşkilatının (BMT) humanitar yardım paylanması fəaliyyətini tamamilə iflic etdiyini bildirib.

VOA xəbər verir ki, kəskin yanacaq çatışmazlığı ucbatından BMT-yə məxsus 170 konteyner təcili insani yardım ehtiyac sahiblərinə çatdırıla bilmir.

Kuba Xarici İşlər Naziri Bruno Rodriqes "X" sosial şəbəkəsindəki hesabında etdiyi paylaşımda yanacaq qıtlığı səbəbindən yolda qalan yardımların ümumi dəyərinin 6,3 milyon dollar olduğunu açıqlayıb.

Ağ Ev rəhbəri Donald Tramp administrasiyası cari ilin yanvar ayında Kubanın ən böyük neft tədarükçüsü olan Venesueladan gələn bütün daşımaları qanunsuz elan edərək dayandırıb və adaya neft gətirən digər ölkələri də ağır sanksiyalarla təhdid edib. Bu aqressiv embarqo müddətində Kubaya yalnız Rusiyadan gələn bir neft tankerinin daxil ola bildiyi qeyd edilir. Hazırda paytaxt Havananın bir çox bölgələrində 30 saata çatan elektrik kəsintiləri yaşanır; qida, içməli su və dərman tapmaq getdikcə qeyri-mümkün hala gəlir.

BMT-nin İnsan Hüquqları üzrə Ali Komissarı Volker Türk ABŞ sanksiyalarının "dərhal dayandırılması" çağırışını edərək vəziyyətin dözülməz olduğunu bildirib.

ABŞ Prezidenti Donald Tramp isə Florida sahillərindən cəmi 150 kilometr məsafədə yerləşən Kubanın ABŞ-ın milli təhlükəsizliyinə böyük geosiyasi təhdid yaratdığını iddia edir. Tramp 9,6 milyon əhalisi olan ada dövlətindəki mövcud böhranı fürsət bilərək, rəsmi Vaşinqtonun Kuba üzərində “dostyana bir ələ keçirmə” ehtimalını belə gündəmə gətirib.