BAKI,VOA,Yusif Şərifzadə
ABŞ Xəzinədarlıq naziri Skott Bessent Vaşinqtonun İrana qarşı sanksiyaların yumşaldılması məsələsində mövqeyinin dəyişmədiyini açıqlayıb.
VOA xəbər verir ki, Skott Bessent jurnalistlərin ABŞ-ın İrana qarşı tətbiq etdiyi sanksiyaların yumşaldılması ehtimalı ilə bağlı sualını cavablandırarkən Vaşinqtonun əsas şərtlərini açıqlayıb.
Nazirin sözlərinə görə, ABŞ Hörmüz boğazının tam şəkildə açıldığını və İranın yüksək zənginləşdirilmiş uranı təhvil verməyə razılaşdığını görmədən heç bir sanksiya güzəşti gündəmə gətirməyəcək.
“Biz Hörmüz boğazının açıldığını görməyənə və iranlıların yüksək zənginləşdirilmiş uranı təhvil verməyə razılaşmayana qədər heç nə gündəmdə olmayacaq,” — deyə Bessent bildirib.
Açıqlama ABŞ və İran arasında davam edən danışıqlar, qarşılıqlı hərbi gərginlik və nüvə proqramı ətrafında mübahisələrin davam etdiyi bir dövrdə səsləndirilib.
Analitiklər qeyd edirlər ki, Vaşinqton bu mövqe ilə həm regional təhlükəsizlik, həm də nüvə məsələsində Tehrana qarşı təzyiq vasitələrini qorumağa çalışır.
Ekspertlərin fikrincə, Hörmüz boğazının açılması ABŞ üçün yalnız enerji daşımaları baxımından deyil, həm də beynəlxalq dəniz ticarətinin təhlükəsizliyi baxımından strateji əhəmiyyət daşıyır.
Müşahidəçilər bildirirlər ki, yüksək zənginləşdirilmiş uran məsələsi ABŞ–İran danışıqlarında ən həssas mövzulardan biri olaraq qalır və tərəflər arasında yekun razılaşmanın əldə olunmasını çətinləşdirir.
Son həftələr tərəflər arasında həm diplomatik təmaslar, həm də qarşılıqlı təzyiq və sərt bəyanatlar paralel şəkildə davam edir.