BAKI,VOA, Fərid Mikayılov

Almaniya və Suriya qaçqınların geri dönüşü ilə bağlı birgə əməkdaşlıq istiqamətində mühüm addımlar atır.

VOA xəbər verir ki, Almaniya kansleri Fridrix Merts və Suriya Prezidenti Əhməd əş-Şəraa Berlində keçirilən görüş zamanı Almaniyada yaşayan suriyalıların böyük hissəsinin ölkələrinə qayıtması məsələsində ortaq mövqe nümayiş etdiriblər.

Məlumata görə, tərəflər Almaniyadakı suriyalıların təxminən 80 faizinin yaxın üç il ərzində geri dönməsi üçün birgə fəaliyyət planı üzərində işləyir. Almaniya hazırda Avropa İttifaqı daxilində ən böyük suriyalı diasporaya ev sahibliyi edir.

Görüş zamanı Əhməd əş-Şəraa bildirib ki, Almaniya ilə birlikdə “dövri miqrasiya” modeli hazırlanır. Bu model çərçivəsində Suriyada yenidənqurma prosesinə töhfə vermək istəyən şəxslərin həm Almaniyada qazandıqları sabitliyi qoruması, həm də vətənlərinə dəstək göstərməsi nəzərdə tutulur.

Eyni zamanda, Almaniya hökuməti Suriyanın yenidən qurulmasına dəstək verməyə hazır olduğunu açıqlayıb və yaxın günlərdə rəsmi nümayəndə heyətinin Dəməşqə səfərinin planlaşdırıldığı bildirilib.