BAKI,VOA, Fərid Mikayılov

İsrailin dar tərkibli Təhlükəsizlik Kabinetinin (Kabinet) üzvü Avi Dixter ölkəsinin İrandakı hərbi əməliyyatları və ABŞ ilə münasibətləri barədə mühüm bəyanatlarla çıxış edib.

VOA xəbər verir ki, Dixter İsrailin hücum strategiyasında müstəqil hərəkət etdiyini vurğulayıb.

Avi Dixter bildirib ki, İsrail ordusunun İranda vurduğu bütün hədəflər Vaşinqtonla əvvəlcədən razılaşdırılmır.

"İranda hücum etdiyimiz hər bir hədəfi Vaşinqtonla koordinasiya etmirik" - deyə o qeyd edib.

Buna baxmayaraq, rəsmi qeyd edib ki, bəzi strateji hədəflər ABŞ ilə birlikdə müəyyən edilib və bu məsələdə geri addım atılmayacaq. Onun sözlərinə görə, əsas məqsəd İran tərəfindən gələn ekzistensial təhlükənin tamamilə aradan qaldırılmasıdır.

İranın mümkün cavab zərbələrinə toxunan Dixter, İsrailin enerji infrastrukturunun digər regional ölkələrdən fərqli olduğunu qeyd edib.

"Bəxtimiz gətirib ki, bizim körfəz ölkələrindəki kimi İranın vura biləcəyi böyük enerji obyektlərimiz yoxdur" - deyə o əlavə edib.