BAKI, VOA, Orxan Qədirzadə

İran rəhbərliyi bəyan edib ki, ABŞ-nin ölkəyə qarşı planlaşdırdığı hər hansı hərbi hücum, o cümlədən məhdud miqyaslı zərbələr birbaşa təcavüz aktı kimi qiymətləndiriləcək və sərt cavab tədbirləri ilə nəticələnəcək.

VOA xəbər verir ki, İran Xarici İşlər Nazirliyinin sözçüsü İsmayıl Baqai Tehranda keçirilən brifinqdə "məhdud zərbə" anlayışını qəbul etmədiklərini bildirib.

Sözçü vurğulayıb ki, istənilən hərbi müdaxilə təcavüz sayılır və hər bir dövlət özünümüdafiə hüququ çərçivəsində belə bir addıma amansızcasına reaksiya vermək iqtidarındadır. Baqainin sözlərinə görə, İran da məhz bu yolu seçəcək.

Xatırladaq ki, cümə günü Donald Tramp Tehranın ABŞ ilə yeni saziş əldə etməyəcəyi təqdirdə məhdud hərbi zərbə ehtimalını masada saxladığını təsdiqləmişdi. Bu bəyanatlar bölgədə ABŞ-nin hərbi gücünü artırdığı bir dönəmdə səslənir.

Hazırda iki ölkə arasında Omanın vasitəçiliyi ilə İsveçrədə dolayı danışıqların ikinci raundu başa çatıb. Növbəti görüşün cümə axşamı keçirilməsi planlaşdırılır. İran tərəfindən danışıqlara xarici işlər naziri Abbas Araqçi rəhbərlik edir, ABŞ-ni isə xüsusi elçi Stiv Vitkoff və Trampın kürəkəni Cared Kuşner təmsil edir.

Vitkoff Fox News-a verdiyi müsahibədə Trampın İranın hələ də "təslim olmamasından" təəccübləndiyini qeyd etsə də, Baqai buna cavab olaraq iranlıların tarix boyu heç vaxt kapitulyasiya etmədiklərini vurğulayıb.