BAKI,VOA, Fərid Mikayılov

Niger Müdafiə naziri general Salifu Modi paytaxt Niameydə baş verən hərbi hərəkətliliyin nəzarət altına alındığını və təhlükəsizlik qüvvələrinin hədəfə alınan strateji məntəqələr üzərində nəzarəti bərpa etdiyini açıqlayıb.

VOA xəbər verir ki, Modinin açıqlaması Niameydəki Diori Hamani Beynəlxalq Hava Limanı və Prezident Sarayının ətrafında güclü silah səsləri eşidilməsi və partlayışların baş verməsindən sonra dövlət televiziyasında yayımlanıb.

Nazir bildirib ki, bir qrup hərbçi “hərbi nizamdan ayrılaraq” Niameydəki 101 saylı hərbi bazada bəzi silahdaşlarını saxlamağa cəhd edib. Daha sonra qrup paytaxtın bəzi strateji məntəqələrinə atəş açıb.

Modi Nigerin müdafiə və təhlükəsizlik qüvvələrinin operativ müdaxiləsi nəticəsində hərbi hərəkətliliyin nəzarətə götürüldüyünü bildirib. Onun sözlərinə görə, hədəfə alınan ərazilərdə nəzarət tədricən bərpa edilib.

Nazir Niamey sakinlərini sakit olmağa və gündəlik fəaliyyətlərini normal şəkildə davam etdirməyə çağırıb.

Niameydə hava limanı və Prezident Sarayının ətrafında atəş səsləri eşidilib

Nigerin paytaxtı Niameydə Diori Hamani Beynəlxalq Hava Limanı və Prezident Sarayının ətrafında gecə və səhər saatlarında güclü silah səsləri eşidilib, partlayışlar baş verib.

Hava limanının ərazisində yerləşən 101 saylı hərbi bazanın da hədəfə alındığı hücumdan sonra təhlükəsizlik qüvvələri bölgəyə nəzarəti bərpa edib və əməliyyata başlayıb.

Qeyd edək ki, Diori Hamani Beynəlxalq Hava Limanı bu il daha əvvəl də iki dəfə hücuma məruz qalıb. Yanvar ayında hava limanı və ətrafındakı hərbi baza, iyun ayında isə hava limanı və 101 saylı hərbi baza hədəfə alınıb.