BAKI, AzerVoice, Orxan Qədirzadə
Kolumbiyanın xarici işlər naziri Rosa Yolanda Villavicencio ölkəsinin suverenliyinə qarşı istənilən xarici təcavüzə hərbi cavab veriləcəyini bəyan edib. Nazir bu açıqlama ilə ABŞ Prezidenti Donald Trampın son bəyanatlarına reaksiya verib.
AzerVoice xəbər verir ki, Villavicencio çərşənbə axşamı keçirdiyi mətbuat konfransında beynəlxalq hüquqa əsasən dövlətlərin özünümüdafiə hüququna malik olduğunu vurğulayıb.
“Əgər belə bir təcavüz baş verərsə, ordu milli ərazini və ölkənin suverenliyini qorumağa borcludur”, – deyə nazir bildirib.
Onun sözləri ABŞ-ın şənbə günü səhər saatlarında Venesuelaya qarşı həyata keçirdiyi hərbi əməliyyatdan sonra regionda yaranmış gərginlik fonunda səsləndirilib. Sözügedən əməliyyat nəticəsində onlarla insanın həlak olduğu, Venesuela Prezidenti Nikolás Maduro və həyat yoldaşı Silia Floresin saxlanıldığı bildirilir.
ABŞ Prezidenti Donald Trump əməliyyatı elan edərkən Qərb yarımkürəsini Vaşinqtonun təsir dairəsi adlandırıb və bunun “Amerika gücünün yenidən təsdiqi” olduğunu deyib. O, hərbi əməliyyatın ABŞ-ın suverenliyinə və vətəndaşlarının həyatına təhlükə yaradanlara xəbərdarlıq xarakteri daşıdığını vurğulayıb.
Tramp Venesuela Prezidenti Maduronu narkotik alveri şəbəkəsinin rəhbəri olmaqda ittiham edib və ABŞ-da minlərlə insanın narkotikdən ölümünə görə onu məsuliyyət daşımaqda günahlandırıb.
ABŞ prezidenti bazar günü “Air Force One” təyyarəsində jurnalistlərə açıqlamasında Venesuela ilə Kolumbiyanı müqayisə edərək, Kolumbiyanı dünyanın ən böyük kokain istehsalçısı adlandırıb və ölkə Prezidenti Gustavo Petro barədə sərt ifadələr işlədib. Mümkün ABŞ əməliyyatı ilə bağlı suala isə “yaxşı səslənir” cavabını verib.
Petro administrasiyası isə narkotik alverinə qarşı mübarizəni gücləndirdiyini, laboratoriyaların məhv edildiyini və daşımaların qarşısının alındığını bildirir. Keçən ilin noyabrında hökumət son on ilin ən böyük kokain müsadirəsini – 14 ton narkotik vasitənin ələ keçirildiyini açıqlayıb.
Kolumbiyanın ilk solçu prezidenti olan Petro ABŞ-ın Venesuelaya hücumunu pisləyib və Latın Amerikasını “xarici maraqların qulluqçusu və köləsi” olmamaq üçün birliyə çağırıb. O, ABŞ-ın Cənubi Amerikanın paytaxtını bombalayan ilk ölkə olduğunu bildirib və bunun uzunmüddətli tarixi nəticələri olacağını vurğulayıb.
Petro həmçinin ölkəsinə qarşı xarici hücum olacağı təqdirdə silaha yenidən sarıla biləcəyini istisna etməyib.
Xarici işlər naziri Villavicencio isə Kolumbiyanın narkotiklərlə mübarizəni “qətiyyət, fədakarlıq və kompleks yanaşma” ilə apardığını bildirib və Latın Amerikası ölkələrinin suverenliyinə, eləcə də demokratik yolla seçilmiş Kolumbiya prezidentinə qarşı istənilən hədələri rədd etdiklərini deyib.