BAKI, AzerVoice, Nərmin Ağayeva

ABŞ Prezidenti Donald Tramp Vaşinqtonda “ictimai təhlükəsizlik fövqəladə vəziyyəti” elan etdikdən sonra şəhərdə cinayət nisbətlərinin kəskin şəkildə azaldığını, xüsusilə avtomobil qaçırma hallarının 87 faiz düşdüyünü bəyan edib.

AzerVoice xəbər verir ki, Tramp, avqustun 11-də elan etdiyi “ictimai təhlükəsizlik fövqəladə vəziyyəti” çərçivəsində Vaşinqtonda avtomobil qaçırma hallarının 87 faiz azaldığını, eləcə də digər cinayət kateqoriyalarında əhəmiyyətli enişlər müşahidə olunduğunu bildirib. O, “Vaşinqton cəmi 14 gün ərzində planlaşdırılandan çox daha sürətli cinayətdən azad zona olacaq,” – deyə vurğulayıb.

Qeyd edək ki, Tramp administrasiyası vəzifəyə gəldikdən sonra Vaşinqton D.C.-nin yerli hökumətlərini cinayət və evsizliklə mübarizədə uğursuzluqda ittiham edib. Paytaxtda cinayət nisbətlərinin artdığını iddia edən Tramp, şəhərin təhlükəsiz, təmiz və yaşana bilən bir məkana çevrilməsi üçün federal hökumətin idarəçiliyi ələ almasını müdafiə etmişdi. Bu məqsədlə, avqustun 11-də Tramp “Vaşinqtonda təhlükəsizliyin təmin edilməsi və küçələri evsizlərdən təmizləmək” kimi səbəblərlə Vaşinqtonun Metropolitan Polis İdarəsini federal nəzarətə götürüb və şəhərə təxminən 800 Milli Qvardiya əsgəri yerləşdirib.