BAKI, AzerVoice - Təcrübəli iranlı diplomat, İslam Respublikasının tanınmış siyasi simalarından olan Məhəmməd Sədr Rusiyanı İsrailə dəstək verməkdə ittiham edib. O, iddia edir ki, Moskva İrana məxsus müdafiə məlumatlarını İsrailə ötürüb və sabiq prezident İbrahim Rəisinin helikopter qəzasının da İsrailin planlı əməliyyatı nəticəsində baş verib.
“İsraillə İran İslam Respublikası arasında 12 gün davam edən müharibədə və ondan əvvəlki qarşıdurmalarda ruslar ölkənin müdafiə mərkəzlərinə aid məlumatları İsrailə ötürdülər.”-deyə o qeyd edib.
Onun sözlərinə görə, həmin 12 günlük hava müharibəsi zamanı İsrail ABŞ-ın qısa müddətli iştirakı ilə İranın əsas nüvə obyektlərini bombalayıb, yüksək rütbəli hərbçiləri və nüvə alimlərini öldürüb. İsrail, həmçinin İranın hava hücumundan müdafiə sistemlərini demək olar ki, tamamilə sıradan çıxarıb və ballistik silah anbarlarına ciddi ziyan vurub.
“Rusiya NATO üzvü olan Türkiyəyə S-400 hava müdafiə sistemi satmağa hazır idi, amma bizə vermədi. Halbuki bizimlə strateji müqaviləsi var. Uzun müddətdir Su-35 qırıcılarının alınmasından danışılır, amma bunları da bizə təhvil verməyib. Rusiyanın İsrailə xüsusi meyli var. Onlarla münasibətdə olaq, amma etimad etməyək.”-deyə Məhəmməd Sədr Rusiyaya etimadsızlığını vurğulayıb.
Diplomat iddia edir ki, 2024-cü ilin mayında prezident İbrahim Rəisi ilə birlikdə xarici işlər naziri Hüseyn Əmir Abdullahiyan, Təbriz imam-cüməsi Ayətullah Əl-Haşim, Şərqi Azərbaycan valisi Malik Rəhmeti, prezidentin mühafizə xidmətinin rəhbəri Seyid Mehdi Musəvi, SEPAH-ın “Ənsar əl-Mehdi” briqadasının əməkdaşı, eləcə də pilot və onun köməkçisi həlak olduğu helikopter qəzası İsrailin əli ilə törədilib.
“Bu əməliyyatla İsrail açıq mesaj verdi: əgər İran davam etsə, biz də davam edəcəyik.”-deyə o qeyd edib.