BAKI, AzerVoice, Nərmin Ağayeva
Tramp Ukrayna üçün təhlükəsizlik zəmanətləri hazırlanmasını tapşırıb.
AzerVoice xəbər verir ki, ABŞ prezidenti Donald Tramp Birləşmiş Qərargah Rəisləri Komitəsinin sədri Den Keynə Avropa ölkələrinin rəhbərlik etdiyi “Çoxmillətli Ukrayna” koalisiyası üçün “NATO-ya bənzər təhlükəsizlik zəmanətləri” hazırlamağı tapşırıb.
“The Wall Street Journal”ın məlumatına görə, bu tapşırıq Trampın avqustun 15-də Rusiya prezidenti Vladimir Putinlə nəticəsiz görüşündən sonra verilib.
Rəsmilər bildiriblər ki, Keyn bu tapşırığı Böyük Britaniya, Fransa və Almaniyanın rəhbərlik etdiyi koalisiyanın təhlükəsizlik mexanizmlərini qurmaq üçün alıb. Tramp Fox News-a verdiyi müsahibədə Avropa liderlərinin ABŞ-dan daha çox müharibəyə cəlb olunduğunu qeyd edərək, “Bu bir növ təhlükəsizlik olacaq, lakin bu NATO ola bilməz; heç vaxt olmayacaq”- deyə bildirib.
Ağ Evin mətbuat katibi Karoline Leavitt əlavə edib ki, Tramp Ukraynada təhlükəsizlik zəmanətlərinin davamlı sülh üçün vacib olduğunu qəbul edir, amma ABŞ-ın yerdə qoşunlarının olmayacağını birmənalı şəkildə bildirib.
Xatırladaq ki, Avqustun 18-də Tramp Ukrayna prezidenti Vladimir Zelenski və Avropa liderləri ilə görüşüb. Görüşdə NATO-nun baş katibi Mark Rutte, Aİ Komissiyasının sədri Ursula fon der Leyen, Fransa prezidenti Emmanuel Makron, Böyük Britaniyanın baş naziri Key Starmer, Finlandiya prezidenti Aleksandr Stubb, İtaliyanın baş naziri Giorgia Meloni və Almaniyanın baş naziri də iştirak edib.
Tramp görüşdən sonra Avropa liderləri ilə əlaqələrin yaxşı olduğunu və rusiyalı həmkarı Putin və Zelenski ilə üçtərəfli sammitə hazırlıqlara başladığını açıqlayıb.