BAKI, AzerVoice, Zeynəb Raminqızı

Portuqaliya və İspaniya yay fəslinin ikinci isti dalğası səbəbindən meşə yanğınlarına qarşı yüksək hazırlıq və həyəcan rejiminə keçib.

AzerVoice xəbər verir ki, Portuqaliya hökuməti ölkənin mərkəzi və şimal bölgələrində temperaturun kəskin artması və artan yanğın riski səbəbindən ən yüksək hazırlıq rejimini elan edib. Hər iki ölkədə yüzlərlə yanğınsöndürən və texnika səfərbər olunub, bəzi bölgələrdə meşə ərazilərinə giriş qadağan edilib.

Hazırda Portuqaliyanın Vila Real, Celorico de Basto, Fafe və Arcos de Valdevez bölgələrində genişmiqyaslı meşə yanğınları davam edir.

Milli Fövqəladə Hallar və Mülki Müdafiə Agentliyinin (ANEPC) rəsmisi Pedro Araujo bildirib ki, təkcə şimal bölgələrindəki iki böyük yanğının söndürülməsinə 600-dən çox yanğınsöndürən və 216 texnika cəlb olunub. Səhər saatlarından etibarən söndürmə işlərinə hava qüvvələri də dəstək verir.

Portuqaliyanın Daxili işlər naziri Maria Lucia Amaral həftəni “çətin bir dönəm” kimi xarakterizə edərək, istilərlə əlaqədar olaraq meşəlik ərazilərə girişin, açıq havada ocaq qalamağın, kənd təsərrüfatı texnikasının istifadəsinin və pirotexniki vasitələrin işlədilməsinin qadağan edildiyini açıqlayıb.

Portuqaliyanın Pireney yarımadasındakı qonşusu İspaniyada da vəziyyət gərgindir. Ölkənin altı muxtar bölgəsində istilərlə əlaqədar meşə yanğınlarına qarşı fövqəladə tədbirlər görülür.

Qalisiya və Ekstremadura bölgələrində iki aktiv yanğınla mübarizə aparılır. Ötən həftə Qalisiyada 1350 hektar meşə sahəsi yanaraq məhv olub.

İspaniya Meteorologiya İnstitutu (AEMET) avqustun 3-də ölkənin cənubundakı Badajoz və Ciudad Real şəhərlərində temperaturun 43°C-ni keçdiyini bildirib. Sinoptiklərin proqnozuna görə, isti hava dalğası gələn bazar gününə qədər davam edəcək.

Son illərdə iqlim dəyişikliyi ilə əlaqədar olaraq, Avropada istilik dalğalarının və meşə yanğınlarının sayı və şiddəti artır. Uzmanlar, xüsusilə cənub ölkələrində yay aylarında yanğın riskinin daha erkən başladığını və daha uzun sürdüyünü bildirirlər.