BAKI, AzerVoice, Səməd Əyyubov – HƏMAS-ın hərbi qolu olan “İzzəddin əl-Qəssam Briqadaları” Beynəlxalq Qırmızı Xaç Komitəsinin (BQXK) girovlara humanitar yardım çatdırılması ilə bağlı istənilən müraciətinə cavab verməyə hazır olduqlarını bildirib.
AzerVoice xəbər verir ki, bu barədə hərəkatın rəsmi nümayəndəsi Əbu Ubeydənin “HƏMAS”ın “Telegram” kanalında dərc olunan bəyanatında qeyd olunub.
Bəyanatda vurğulanıb ki, “İzzəddin əl-Qəssam Briqadaları” BQXK-nın bu məsələ ilə bağlı istənilən sorğusuna cavab verməyə hazırdır.
Qeyd edək ki, bu il martın 2-dən etibarən Qəzza zolağına beynəlxalq humanitar yardım çatdırılmır. İsrail hakimiyyətinin qərarına əsasən, bütün nəzarət-buraxılış məntəqələri bağlanıb. Ərzaq paylanması isə İsrail və ABŞ-ın nəzarətində olan “Qəzza Humanitar Yardım Fondu” vasitəsilə həyata keçirilir.
Yanvar ayında əldə edilmiş atəşkəsə baxmayaraq, mart ayında İsrail ordusu Qəzzada hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtləri üzərində razılaşa bilməyiblər.